İlk dəfə İmişlidə

İmişli – Bakıdan 250 km aralıda yerləşən Aran rayonu. Budəfəki səfərimiz oradı. Seçim isə səbəsiz deyil. PFL divizionda fevralın ən yaxşı qolunun müəllifi olan “Mil-Muğan”lı Kamil Nurəhmədovu 19-cu turun “Zaqatala” ilə ev oyunundan öncə mükafatlandıracaq, biz isə özümüz üçün yeni məkan kəşf edəcəyik. Hansı ki, içi mənqarışıq əksər həkarlarımızın heç vaxt yolu düşmədiyi bir yer…

Fərqli qəbirstanlıqların “sakin”ləri
Təxminən, saat 09:30-da Bakıdan İmişliyə yola düşdük. Bizi qarşıda 3-4 saatlıq yol gözləyirdi… Amma kollektiv maraqlıdı insanlardan təşkil olunubsa, yolda keçən vaxtın fərqinə varmırsan. Bu dəfə də fərqli olmadı. Peşəkar Futbol Liqasının xüsusən divizion oyunlarına diqqət göstərməsi, jurnalistlər üçün səfər təşkil etməsi alqışlanası təşəbbüsdü.

İlk dəfə İmişlidə olduğumdan gördüyüm hər şey mənim üçün yenilik idi. Rayonda fərqli bir şey görməsəm də, ən çox diqqətimi cəlb edən yolun kənarındakı qəbirstanlıq oldu. Amma bilmədim ki, bu qəbirstanlıq “MKT-Araz”lı Artyom Bezrodnı sərxoş halda gecələdiyi məkandı, ya yox? Hansı ki, indi həm sözügedən klub, həm də futbolçu fərqli-fərqli qəbirstanlıqda “dəfn” və dəfn olunublar.

Sələfindən əmanət qalan baza
Düzdü, “pambıqçılar” canını tapşırsa da, İmişlidə futbol yaşayır, lap “MKT-Araz”ın adı kimi. İndi Aranın qəlbi “Mil-Muğan”la atır. Amma təəssüf ki, bu komandanın adına demək olar ki, ancaq rəsmi sənədlərdə rast gəlmək olar. 2006-cı ildə “MKT-Araz” üçün açılan stadionun hər yanında “MKT-Araz”ın adına rast gəlmək mümkündü.

Söhbət bazadan düşmüşkən, imişlililərin şəraitini elita klubları ilə müqayisə etmək olar. Birvaxtlar beynəlxalq oyunlara da ev sahibliyi etmiş 8500 nəfərlik əsas və  süni örtüklü köməkçi meydançadan savayı, futbolçuların qalmağı, qidalanması üçün hər cür şərait var. Amma öt örtüyü demək olar ki, yararsız vəziyyətdədi. Komanda Premyer Liqaya buraxılacağı təqdirdə belə qazonda oyun keçirmək qeyri-mümkündü. Əsas meydançanın çox hissəsi qumdan ibarətdi. Amma vəziyyət heç də çıxılmaz deyil, təməl bazası olan kluba bir az diqqət və ya açıq desək, normal sponsor lazımdı. Hətta onu da qeyd etmək lazımdı ki, imişlililərin bütün yaş qruplarından ibarət komandaları, hətta qızlar komandası da fəaliyyət göstərir.

Bizi qarşılayan Niyaməddin Musayev
Sabiq ölkə prezidenti Heydər Əliyevin adını daşıyan stadionda bizi ilk qarşılayan Niyaməddin Musayevin mahnıları oldu. Futbolçuların matçöncəsi isinmə hərəkətləri məhz əslən bu rayondan olan Musayevin mahnısının sədaları altında davam edirdi.

Azarkeşlər
Matçın startı yaxınlaşdıqca tribunalar dolmağa başlayırdı. 10-12 il əvvəl olduğu kimi, dolu tribunalar görməsək də, divizion səviyyəsində normal azarkeşlik görmək mümkün oldu. Bir tərəfdə dayanmadan komandasını irəli səsləyən fan-klub əyləşmişdisə, üzbəüz sektorda əsasən pərakəndə şəkildə və daha çox yaşlı insanlar yer almışdı. Amma onların da çılğınlığını xüsusi vurğulamaq lazımdı. Düzdü, fan-klub qədər komplekləşmiş şəkildə olmasalar da, sevimlililərinin hücumlarına biganə qalmırdılar. 60-70 yaşlı ağsaqqalar hətta bəzən yerli, qonaq komanda demədən hər iki komandaların futbolçularını təhqir edirdi.

Tək qol və polislərin çayxana keyfi
Matç qarşılıqlı hücumlarla başladı. Hər iki tərəf fərqlənməyə yaxın olsa da, ilk yarıda qol vurulmadı. Komandalar paltardəyişmə qolsuz yollandılar.

İkinci hissə başlayanda tribunalarda polislər gözə dəymirdi. Asayiş keşikçiləri bazanın ərazisindəki çayxanada idilər. Bu məqam matçın hakim-inspektoru Sabir Mütəllimovun da diqqətindən yayınmamışdı. O, hətta polis mayoruna gileylənərək, ikinci hissənin başlamasına rəğmən, hələ də əməkdaşlarının öz yerlərini almamasını, hakimlər briqadasını da ikinci yarıya özünün çıxardığını bildirirdi.

Qarşılaşmanın 2-ci 45 dəqiqəsi isə daha sərt keçdi. Xüsusilə də hesab açıldıqdan sonra… Komandalar meydanda bir-birlərini şaqqalamağa hazır idilər.

Görüşün son dəqiqələri isə daha mübahisəli məqmalarla yadda qaldı. Hesabda geri düşən meydan sahibləri hamılıqla hücum altıldılar. Artırılmış dəqiqələrdə 2 dəfə ciddi cəhdlə baş hakim Ramil Diniyevdən penalti tələb edən imişlili futbolçuların bu istəyini yerinə yetirməyən fit sahibi oyunu elə bu hesabla da bitirdi – “Zaqatala” səfərdə layiq olduğu qələbəni qazandı.

Matç bitdi, amma mövsüm davam edir. “Mil-Muğan” üçün yüksək pillələr əlçatmazdı. Lakin əsas odur ki, İmişlidə futbol yaşayır və yerli komandanın daha yaxşı olması üçün qayğıya ehtiyacı var.

ELMAR ABDULLA-ZADƏ, Bakı – İmişli – Bakı