Müsahibə
İlqar Qurbanov: "İnşallah, biz də o fəlsəfəyə uyğun gələrik"
"Qarabağ"ın müdafiəçisi İlqar Qurbanov Topaz…
"Qarabağ"ın müdafiəçisi İlqar Qurbanov Topaz Premyer Liqasının 22-ci turu çərçivəsində AZAL üzərində qazandıqları qələbədən (1:0) sonra futbolinfo.az saytının da suallarını cavablandırıb:
– Çətin qələbə qazandınız…
– Sevinirik ki, qələbə qazandıq. Çox maraqlı, yüksək templi oyun keçdi. Yaxşı mübarizə apardıq, amma bir çox qol vəziyyətindən yararlana bilmədik. İkinci hissədə qələbə topunu vurmağı bacardıq. Çempionatın sonlarına yaxınlaşırıq. Xal itirmək bizim üçün böyük itki olar. Hər oyuna ciddi hazırlaşırıq. Daha güvənli, səbrli, ağıllı oynayırıq.
– Bu gün əsas rəqibiniz “Qəbələ” səfərdə “Neftçi” ilə qarşılaşacaq. Bu oyunda hansı hesabı gözləyirsən?
– Əlbəttə, istəyərəm ki, bizə sərf edən nəticə olsun. Amma biz öz oyunumuza diqqət etsək, üstünlük sona qədər bizdə olar.
– İlk hissədə sanki komandada aqresiya çatmırdı, təhlükəli epizodlar yarada bilmirdiniz. Səncə, səbəbi nədir?
– İmkanlarımız oldu. Qol vura bilməyəndə də səbrli olmalısan. Çünki əks halda öz qapında qol görə bilərsən. İkinci hissə tempi artırdıq və qələbə qolunu vurduq.
– Sənin mövqeyində oynayan, çox vaxt ehtiyatda qalan komanda yoldaşın Arif Daşdəmirov yığmaya çağırıldı, ancaq sən dəvət olunmadın. Təəssüf hissi keçirirsən?
– Xeyr. Bu sualı mənə hər zaman verirlər. Mən bu barədə bir şey deyə bilmərəm. Milli komandada oynamaq təbii ki, istəyərəm. Artıq 7 ildir ki, yığmadan kənarda qalmışam.
– Bəlkə, sən də Prosineçkinin fəlsəfəsinə uyğun gəlmirsən?
– Bilmirəm bu fəlsəfə nədir. İnşallah, biz də o fəlsəfəyə uyğun gələrik (gülür).
ELMAR ABDULLA-ZADƏ