Ölkə futbolu
Ramin Musayev: “Əcnəbi hakimlərin gəlməsinin əleyhinəyəm”
“Naxçıvanda idmana böyük maraq var. Burda tək…
“Naxçıvanda idmana böyük maraq var. Burda tək futbolla yox, çox idman növləri ilə yaşayırlar. Naxçıvanı idman şəhəri adlandırmaq olar”. Futbolinfo.az xəbər verir ki, bu sözləri Peşəkar Futbol Liqasının (PFL) prezidenti Ramin Musayev deyib.
Bu gün ölkə kubokunun finalından öncə Heydər Əliyev Kubokunun təqdimat mərasimi keçirilib. Mərasimdə Naxçıvan Muxtar Respublikasının Gənclər və İdman naziri Azad Cabbarov və PFL prezidenti Ramin Musayev iştirak edib.
Bu il Naxçıvanda futbol üzrə Heydər Əliyev kuboku keçiriləcək. Mayın 26-da start götürəcək yarışda 6 və ya 8 komanda iştirak edəcək. Komandaların adları ayın 20-də açıqlanacaq. Turnirin qalibinə Türkiyədə hazırlanmış kubok təqdim olunacaq.
Musayev öncə ölkə kubokunun finalının Naxçıvana salınması barədə danışıb. O, həmçinin Heydər Əliyev Kuboku barədə məlumat verib:
– Mənə kubokun finalının Naxçıvana salınması ilə bağlı çox sual verildi. Mən də sual verirəm ki, niyə Naxçıvanda keçirməyək? Nəyi pisdi? “Qarabağ” və “Qəbələ”də olan legioner futbolçular bizim bu gözəl guşəmizi görməmişdilər. Dünən Roman Qriqorçuk Naxçıvan haqda ağızdolusu danışdı. Bir dəfə kubokun finalını Qəbələdə keçirdik. Superkuboku isə bərpa edəndən sonra Naxçıvanda təşkil etdik. Bunun nəyi pisdi? İnşallah, bu gün maraqlı oyun izləyəcəyik. Mayın 26-da ulu öndərin xatirəsinə həsr olunmuş yarış keçiriləcək. Ölkə xaricindən də komandalar bu turnirə qatıla bilərlər. Söz veriblər, dəqiqləşməmiş yazılı məlumat vermək istəmirik. “Şəmkir”, MOİK və “Zaqatala” da bu turnirə qatılmaq istəyir.
– Naxçıvan çempionatında yüksək yer tutmuş komandalarla Azərbaycan çempionatında mükafat qazanmış klubların avrokuboka vəsiqə uğrunda gələcəkdə pley-off oyunu keçirməsi mümkündümü?
– Avropada oynayan komanda Azərbaycanı yetərincə təmsil edəcək səviyyədə olmalıdı. AFFA rəhbərliyi dəyişəndən, Rövnəq Abdullayev qurumun prezidenti olandan sonra haqq-ədalət öz yerini tapdı. İndi Azərbaycan futbolu öz sözünü deyə bilir. Nyon şəhərindəki püşkatma zamanı “Qarabağ”ın adı yazılanda mən böyük sevinc hissi keçirdim. Biz “Qarabağ”ın Azərbaycana aid olduğunu futbolla bir daha sübuta yetirdik. Naxçıvan çempionatında iştirak edəcək komandaların vəziyyəti Avropada çıxış etməyə imkan verirmi?
– Heydər Əliyev Kubokuna əcnəbi hakimlər də gələcəkmi?
– Əcnəbi hakimlərin gəlməsinin əleyhinəyəm. Bu, yerli referilərə hörmətsizlik olar. Çempionlar Liqasının oyunlarına baxırıq, 3 qolun hamısı ofsayddan vurulur. Bizim hakimlərdən danışırıqsa, rüşvətdən, qərəzdən söhbət gedə bilməz. Bu, mümkün deyil. Sadəcə, təzyiq olanda o insan özünü itirir. Klub rəsmilərinə də deyirəm ki, gəlin, hakimlərin üzərinə çox getməyək.
– Oyunlar ancaq Naxçıvan stadionunda keçiriləcək?
– (suala Cabbarov cavab verir) Artıq 4 stadionumuz hazırdı, onlara PFL rəsmiləri də baxacaqlar. Bu stadionlarda hər bir şərait yaradılıb. Yəqin ki, 2-3 stadiondan istifadə olunacaq.
– Ramin müəliim, kubokun finalının Naxçıvanda keçirilməsinə azarkeşlər narazılıq edirdilər…
– Bəs burdakı azarkeşləri saymırsınız? Dünən 5-6 yaşlı uşaqlar gəlib dedilər ki, mənə 3 bilet verin. Dedim biletləri neynirsən? Qayıtdı ki, mən, anam və bacım futbola baxmaq istəyirik. Gəlmək istəyən oğlan gəlir. “Qəbələ”nin və “Qarabağ”ın çempionatdakı son oyunlarına baxın, görün, nə qədər azarkeşləri gəlmişdi? Həmin oyunlar da Naxçıvanda keçirilirdi?
ELMAR ABDULLA-ZADƏ, Naxçıvan