Ölkə futbolu
Samir Əliyev Naxçıvana futbolçu seçməyə gedir
Növbəti mövsümdən Premyer Liqada mübarizə aparm…
Növbəti mövsümdən Premyer Liqada mübarizə aparmaq hüququ qazanan "Səbail" istirahətdə olsa da, transfer çalışmaları davam edir. Bunu komandanın yeni baş məşqçisi Samir Əliyev söyləyib.
Gənc mütəxəssis sport7.az-a açıqlamasında bunları söyləyib: "Hələ ki, seleksiya işləri ilə məşğuluq. Danışıqlar aparırıq, müqavilələr bağlayırıq. Komanda kimi formalaşmaq bəlkə də bir-iki ilə mümkün olacaq. Vaxtımız var, qarşımıza gələcək üçün komanda yaratmaq vəzifəsi qoyulub. Yavaş-yavaş davam edirik. Təbii ki, yoxlanışlar olacaq. Bəzi futbolçuları "ələkdən keçirəcəyik". Hələ ki, məşqçilər korpusu ilə birlikdə məsləhət gördüyümüz futbolçularla anlaşırıq. Say açıqlamırıq, artıq bir neçə futbolçu ilə müqavilə imzalamışıq. Çox güman ki, "Səbail"in birinci diviziondakı komandasından əksər futbolçuları yola salacağıq. Kim özünü göstərəcəksə, onunla yola davam edəcəyik. Bu da uzun məsələdi, müəyyən vaxt lazımdı. Nə qədər çox futbolçu dəvət etsək, o qədər yaxşı olar. Rəqabət gedəcək. Bir çoxları üçün imtahan olacaq. "Səbail"in büdcəsi müəyyənləşib. Amma hələ ki, legioner futbolçu məsələsi ilə bağlı müzakirələr yoxdu. Ehtiyac yaranacağı təqdirdə legioner də alacağıq. Büdcə o qədər yüksək də deyil ki, güclü legioner alaq. Ayağımızı yorğanımıza görə uzadacağıq. Əsas yerli futbolçuların üzərində işləyirik. Eləsi var ki, potensialını tam aça bilməyib. Onlara bu mənada kömək etməyə çalışırıq”.
Əliyev hazırlıq vaxtını da müəyyənləşdirib: “Çox güman, iyunun 10-dan məşqlərə başlayacağıq. Buna qədər təlim-məşq toplanışlarımızın yeri və vaxtı da müəyyənləşər. Xarici toplanış üçün variant çoxdu. Hansı məsləhətli olsa, ora gedəcəyik. Bu həm də müqavilələrin nə vaxt bağlanıb qurtaracağından asılıdı. Hələ Naxçıvanda keçiriləcək turnirə də futbolçu tapmaq üçün gedəcəm".