Ölkə futbolu
“Şəmkir”in prezidentini ifşa etdilər
Mövsümün ilk dövrəsində "Şəmkir"in ?…
Mövsümün ilk dövrəsində "Şəmkir"in şərəfini qoruyan Şahin Baleljae “Sportinfo”ya müraciət edib. I divizionda 6 qol vuran iranlı hücumçu klub rəhbərliyindən şikayətlənib. O, prezident Elvin Səfərli tərəfindən aldadıldığını, 2400 manat maaş borcunu hələ də ala bilmədiyini bildirib.
Şahin həmçinin Səfərlinin bəzi işləklərindən söz açıb: "Şəmkir"də 2400 manat pulum qalıb. Bilmirəm neyləyim. Mən, əslində, birinci divizionda oynamalı deyildim. Azərbaycana Premyer Liqada oynamaq üçün gəlmişdim. "İnter"də baxışdan keçmişdim, bəyənmişdilər. FİFA-nın transfer qadabasına görə "İnter"lə son andap müqavilə bağlaya bilmədim. "Şəmkir"in prezidenti Elvin Səfərli telefon nömrəmi menecer Çinar Məmməddən almışdı.
Dedi ki. gəl bura, sənin üçün əla şərait yaradacağıq, oteldə yer verəcəyik. Dedim, mən İranda Superliqada oynamışam, birinci divizionu neyləyirəm, xoşum gəlmir. Nə isə, birtərəhər dilə tutdu məni, getdim Şəmkirə. 2000 manat maaş istədim, dedi, sən Allah, mənə görə, qiyməti aşağı sal, 1500-ə bağla. Dedim, yaxşı. Birinci ay maaşımı verdi. Amma qalmağa nə normal yer verdi, nə də yemək. Çarəsizlikdən qalmışdım orda. Başqa əlacım yox idi, məcbur olub dözürdüm.
Birinci dövrənin sonunadək 6 qol vurdum. Mən buna 9-12 xal qazandırdım. Ancaq axırda dedi ki, Şahin, mən bura hücumçu gətirirəm, sən limitə düşürsən, ona görə 500 manat maaş alacaqsan. Cavab verdim ki, mən o pula futbol oynamıram. Dedim, pulumu ver, gedim. Yolpulu istədim, onu da vermədim. 200 manatı uzatdı ki, götür bunu, qalanını İrana göndərəcəm. Qəhrəman Əliyevə müraciət etdim, dedi, onunla işin olmasın, borcunu ödəyəcəyini söz veribsə, alacaqsan.
Getdim İrana, pulu arxamca göndərmədi, aldatdı. Güclü komandalara qol vurub, "Şəmkir"ə qələbələr qazandırsam da, bu adam məni çox incitdi, əziyyətə saldı. Çox yalançı insan imiş. Başqa işlər görürdü. Bir dəfə dedi, otaqdan çıxdım bayıra, dedim, mən tapşırdığını etməyəcəm, futbol oynamayacam. Namaz qılan insanam, o dediyi işi görmərəm. Qəhrəman müəllim şahidimdi. Bilir, görüb.
Bu hadisə "Qaradağ Lökbatan"la kubok oyunundan əvvəl olub. İndi özünüz başa düşün ki, Elvin məndən nə istəyib. Dedim, mən belə şeylər bilmirəm. Qaçma, vurma… Bir də "Energetik"lə səfər oyunundan əvvəl olub belə hadisə. Qəhrəman Əliyevin onun əməllərindən xoşu gəlmirdi, boğulurdu. Dözmədi axırda, istefa verib getdi.
Bunları ona görə söyləyirəm ki, qoy, hamı kimin günahkar, kimin günahsız olmasını bilsin. Elvin "Energetik"lə oyundan qabaq gəlib 11 nəfər uşağa dedi ki, bu gün belə edərsiz, elə edərsiz. Hazırlaşırdıq meydançaya çıxaq, hamının içində o sözləri söylədi. Nədənsə həmin futbolçuların heç biri bundan danışmır. Hamısı dilini qoyub qarnına. Bilmirəm bunlar Allahın yanında nə cavab verəcəklər.
Mingəçevirdə 5:0 udduq, üç qolu mən vurdum. Prezident 80-cı dəqiqədən sonra tribunadan texniki zonaya qışqırırdı ki, Şahini tez əvəzləyin, qol vurur, oyunu "xarab" edir. Bunları indiyədək demirdim, özümdə saxlayırdım. Bu haqsızlığı görüncə, artıq fikirləşməyə başladım ki, faktları niyə gizlədim? Artıq hamı bilməlidi ki, o, nə işlər görür. 80-dan o yana mən özüm də dayandım, qaçmadım oyunda. İnsafsızlıq elədi.
Qan-tər axıtdım "Şəmkir" yolunda, pulumu vermədi adam. Allah üstümdədi, yalan deməyim, qalan oyunlarda bir şey hiss etmədim. Çıxdım, öz futbolumu oynadım. Mənə deyirdi ki, sən çıx, qolunu vur, ancaq… Qoymadı "Energetik"ə daha bir qol vurum. Həmin gün orda olan, prezidentin bu sözlərini eşidən futbolçuları anlaya bilmirəm. Niyə susursuz? Onsuz, sizin də pulunuzu verməyib. Yadıma düşmüşkən, Şəmkirdə MOİK-ə qol vurdum, 1:0 udduq. Bu oyun qurtaran kimi gətirib mənə 200 manat verdilər. Dedilər, al, bu pulu götür, səndən bizə çox xeyir yetişdi. Daha bilmədim o nə söz idi".
Şahin dilə gətirməsə də, açıq-aşkar Elvin Səfərlini danışılmış oyunlarda ittiham edir. “Şəmkir”in prezidentinin cavabı, digər futbolçuların deyəcəkləri, eləcə də bu adamın etirafları vasitəsi ilə bir çox adamın əməllərini faş edən AFFA-nın reaksiyası maraqlı olacaq.