“Qarabağ” üçün 12-ci oyunçu olaq!

“Qarabağ” çətin sınaq qarşısındadı. Çempionlar Liqasının pley-offuna yüksələn təmsilçimiz tarixi uğura çox yaxındı.

Oyuna azarkeş marağı, ümumiyyətlə, ictimaiyyətin diqqəti gözlənildiyi kimidi. “Kopenhagen”lə sınaq üçün biletlərin satışa çıxarıldığı ilk gündə 15 min nəfərin kassaya baş çəkməsi ajiotaj olacağından xəbər verir. Deməli, hamının Ağdam klubuna kifayət qədər ümidi var.

İlk oyunlar çox önəmlidi. Bakıda top buraxmadan qalib gəlmək ideal variant olardı. Belədə Danimarkada işi bitirmək mümkünü. Ancaq bu, təkcə klubun bacaracağı iş deyil. Qurban Qurbanovun yetirmələrinə dəstək vermək, onları ruhlandırmaq, yanlarında olmaq hamımızın vəzifəsidi. Biletli azarkeşlər matça təkcə tamaşaçı kimi yox, çılğın fanat kimi yollanmalı, 90 dəqiqə komandanı ruhlandırmalıdı.

“Qarabağ” artıq çox iş görüb. Ardıcıl 4 mövsüm avrokuboklarda qrupa düşmək qitə nəhəglərinə yaraşan nəticədi. Nə MDB məkanında, nə qonşularda, nə də Avropanın bir çox futbol ənənəsi olan ölkələrində son 15-20 ildə belə komanda xatırlamıram. Təmsilçimiz illər boyu çəkdiyi əziyyətin qarşılığında qrupa düşməyi bir nov dəbə mindirib, digər klublarımız üçün də minimum müəyyənləşdirib.

“Qarabağ” onsuz da avrokuboklarda, qruplarda olacaq. Amma könül istər ki, bu dəfə AL-də deyil, ÇL-də mübarizə aparaq. Bunun üçünsə komandanı tək qoymamalı, hər fürsətdə komandanın uğur qazanması üçün çalışmalıyıq. Mətbuat, azarkeşlər, futbol ictimaiyyəti bir olaraq “Qarabağ”a maksimal dəstək verməlidi.

Bu uğuru milyonlar səpələnən əcnəbi məşqçilər yox, zaqatalalı balası Qurban Qurbanov qazanıb. Bəzən səhvləri də olub, yanlışları da, lakin hər zaman ən yaxşı üçün çalışıb, səhvləri də ən yaxşı üçün mübarizə apararkən reallaşıb. Ən yaxşı, amma maliyyə baxımından ölkə standartlarını çox aşmayan əcnəbiləri də “Qarabağ” gətirib, yerli oyunçulara diqqəti də bu klub göstərib, gənclərə şans da ən yaxşı formada bu komandada verilib. “Qarabağ” komandadan kluba çevrilmə prosesini də yekunlaşdırmaqdadı və artıq pul xərclənən, dotasiya qoyulan yox, qazanca işləyən müəssisəyə çevrilir.

Gözəl futbol klubu modelidi. Qüsurları var, amma artıq hamı üçün örnək, nümunədi. İndi heç kəs “Neftçi”yə və ya digər komandaya yox, məhz “Qarabağ”a can atır, işində ağdamlıları prioritet seçir. Belə bir klubumuz olduğu üçün keçmiş SSRİ respublikalarının bizə həsəd aparması fərəhvericidi.

İndi isə bu komandanın dəstəyə ehtiyacı var. “Kopenhagen”i keçib, tarixi uğura imza atmaq üçün 10 günümüz qalır. Qurban Qurbanov və yetirmələri bacardığını edəcək, onlar dayananda biz dəstək olaq. Tribunalara tamaçaşı yox, komandanın 12-ci oyunçusu kimi gedək, futbolçular yorulanda, dayananda onları ruhlandıran dəstəyi verək. Birlikdə bacaracağıq.

FƏRİD