Ölkə futbolu
“Səbail”dən “Topaz”a hörmətsizlik
AFFA İcraiyyə Komitəsinin bugünkü iclasının “Bay?…
AFFA İcraiyyə Komitəsinin bugünkü iclasının “Bayıl Arena”ya salınması təsadüfi deyil. Assosiasiya rəsmiləri stadionun açılışını da edəcək.
Futbolinfo.az xəbər verir ki, bu idman qurğusu uzunmüddətli təmirə bağlanmışdı. Stadionun süni ot örtüyü dəyişdirildi, eyni zamanda əsas binada 3-cü mərtəbə inşa edildi. “Səbail”in bazası olacaq arena bu dəyişikliklərdən sonra 2 çempionat, 1 kubok matçına ev sahibliyi etsə də, rəsmi açılışı məhz bu gün olacaq.
İnsaf naminə, təmir işləri pis aparılmayıb. Stadionun qazonu tam qaydasında olmasa da – ayrı-ayrı hissələrin birləşdirilməsində, döşənməsində kiçik qüsurlar olsa da -, ümumi mənzərə xoşdu. Binaya futbolçuların qalması üçün əlavə edilən 3-cü mərtəbə də uğurlu alınıb.
Bütün bu işlərə nə qədər vəsait sərf olunması hələlik açıqlanmayıb. Bu suala yəqin ki, AFFA rəhbərliyi İcraiyyə Komitəsinin iclasından sonrakı brifinqdə cavab verə biləcək. Eyni zamanda təmir işlərinin xərcini kimin çəkdiyi də aydınlaşmalıdı. Çünki AFFA balansındakı arenanı “Səbail”in istəyinə uyğun təmir edirsə, maliyyə öhdəlikləri dəqiqləşməlidi. Xərci AFFA çəkibsə, bunu çıxarmaq üçün klubdan aldığı icarə haqqını artırmalı və rəsmən açıqlamalıdı. Hər nə qədər AFFA və klub eyni ələ baxsa da, maliyyənin hesabatı aparılmalıdı. SOCAR o qədər sərhədsiz imkanlara malik deyil ki, kiməsə görə assosiasiyanın pulu ilə təmir edilən arena kiməsə havayı istifadə üçün verilsin.
Stadionu təmir edənlər, eləcə də arena rəhbərliyi bir neçə xırda detalı unudub. Burada Premyer Liqa matçları keçirilsə də, indiyədək nə PFL-in, nə də yarışın baş sponsoru “Topaz”ın banerlərini görməmişik. AFFA-nın, müxtəlif şirkətlərin reklam lövhələri olsa da, qeyd etdiyimiz banerlərə rast gəlməmişik. Halbuki, reklam lövhələrinin 25%-i PFL-ə məxsus olmalıdı. Bu, sponsorlara birbaşa hörmətsizlikdi.
AFFA İntizam Komitəsi də bugünədək “Səbail”ə hər hansı cəza kəsməyib. “Qarabağ” və “Zirə” ilə oyunlarda bu çatışmazlıq qeydə alındığına görə, kluba müəyyən məbləğdə (800 manat) cərimə kəsilməli idi. PFL-in bu səhlənkarlığına görə “Topaz”la müqavilə öhdəlikləri də kobud şəkildə pozulur. Ümid edirik, bu gün arenanı gəzəndə AFFA rəhbərliyi bu çatışmazlığın aradan qaldırılması üçün göstəriş verəcək.
FƏRİD