Milli komanda
Moldova ilə onuncu duel
Azərbaycan millisi 2018-ci ildəki ilk yoxlama oyununda yubiley qeyd …
Azərbaycan millisi 2018-ci ildəki ilk yoxlama oyununda yubiley qeyd edəcək. Futbolinfo.az xəbər verir ki, Moldova ilə yanvarın 30-da baş tutacaq görüş rəqiblər arasında yubiley – 10-cu duel olacaq.
Bununla, Moldova ən çox qarşılaşdığımız rəqib adına şərik çıxacaq. İndiyədək yalnız Özbəkistanla 10 dəfə üz-üzə gələn millimiz Antalyada rekordçuları qoşalaşdıracaq.
Türkiyənin Antalya şəhərindəki qarşılaşmayadək komandalar 9 dəfə üz-üzə gəliblər. Millimizin Moldova ilə ilk dueli 24 il öncə – 1994-cü ildə baş tutub.
Həmin vaxt 2:1 hesabı ilə qalib gələn rəqibimiz ümumilikdə üstünlüyə malikdi. Moldova yığması indiyədək 3 dəfə qalib gəlib. Yığmamız isə 2 dəfə rəqibindən güclü olub. Digər 4 qarşılaşmada qalib müəyyənləşməyib. 6 top vuran komandamız öz qapısından 8-ni buraxıb.
Bu oyunlardan 7-si yoxlama, 2-si seçmə xarakteri daşıyıb. Yoxlama görüşlərində hər komanda 2 dəfə sevinibsə, 3 dəfə bərabərlik yaşanıb. DÇ-2002-nin seçmə matçlarında isə rəqibimiz üstünlük qazanıb – 0:0, 0:2.
4 dəfə Bakı, 4 dəfə Kişinyovda qarşılaşan komandaların son dueli də paytaxtımızda baş tutub. 2015-ci ilin noyabrında yığmamız 2:1 hesablı qələbə qazanmışdı.
İndiyədək yalnız 1 dəfə neytral meydanda görüşən rəqiblər 2-ci dəfə belə məkanda üz-üzə gələcək. 8 il öncə Avstriyadakı duel qalibi müəyyənləşdirməmişdi – 1:1.
Qonşu ölkədəki matç Qurban Qurbanov üçün də əlamətdar olacaq. 46 yaşlı mütəxəssis karyerasında ilk dəfə millini rəsmi matça çıxaracaq.
Bu, onun üçün tanış rəqiblə matça təsadüf edəcək. Belə ki, Qurbanov hələ futbolçu ikən moldovalılarla üz-üzə gəlib. O, 2 oyunda bu rəqibə qarşı forma geyinmək imkanı qazanıb.
1998-ci ildə Bakıdakı görüşdə millimiz 1:0 hesabı ilə qələbə qazanıb. 2004-cü ildə Kişinyovdakı qarşılaşmada hesabı məhz Qurbanov açıb. Amma yığmamız iki top buraxaraq vətənə məğlub qayıdıb. Qurbanov 14 ildən sonra yeni amplua ilə moldovalılarla görüşəcək. (Apasport)
Azərbaycan – Moldova: Bütün oyunlar
2 sentyabr 1994. Kişinyov. YO. Moldova – Azərbaycan – 2:1
22 mart 1998. Bakı. YO. Azərbaycan – Moldova – 1:0
24 mart 2001. Bakı. DÇ. Azərbaycan – Moldova – 0:0
1 sentyabr 2001. Kişinyov. DÇ. Moldova – Azərbaycan – 2:0
31 mart 2004. Kişinyov. YO. Moldova – Azərbaycan – 2:1
9 fevral 2005. Bakı. YO. Azərbaycan – Moldova – 0:0
18 may 2006. Kişinyov. YO. Moldova – Azərbaycan – 0:0
26 may 2010. Seekirchen. YO. Moldova – Azərbaycan – 1:1
17 noyabr 2015. Bakı. YO. Azərbaycan – Moldova – 2:1
Qeyd: YO – yoxlama oyunu, DÇ – dünya çempionatının seçmə oyunu