Ölkə futbolu
Yevgeni Kaleşin: “Hər kəs “Qarabağ”ın bu hərəkətini alqışladı”
Rusiyanın “Kuban” klubunun baş məşqçisi Yevgeni…
Rusiyanın “Kuban” klubunun baş məşqçisi Yevgeni Kaleşin Türkiyənin Antalya bölgəsindəki təlim-məşq toplanışı çərçivəsində Azərbaycan çempionu “Qarabağ”a qarşı keçirdikləri yoxlama oyununu şərh edib.
Futbolinfo.az xəbər verir ki, 39 yaşlı mütəxəssis 2:2 hesabıyla başa çatan görüşdən sonra Krasnodar klubunun rəsmi saytına açıqlamasında bunları söyləyib:
“Çox maraqlı oyun alındı. Çempionlar Liqasının iştirakçısı ilə oynadığımız üçün şanslıyıq. Təbii ki, az da olsa, fərq hiss olunurdu. İlk hissədə “Qarabağ” daha sürətli və yüksək səviyyəli oyun sərgilədi. İkinci hissədə isə hər iki komanda heyətdə müəyyən dəyişikliklər etdi. Nəticədə açıq futbol getdi. Penaltidən, eyni zamanda cərimə zərbəsindən baxımlı qollar vurduq. Təəssüf ki, müdafiədə səhv edib, rəqibin fərqlənməsinə şərait yaratdıq. Hər iki hissəni nəzərə alsaq, nəticəni ədalətli hesab etmək olar. Futbolçularımız qarşıya qoyulan vəzifənin öhdəsindən gələ bildilər. Komanda şəklində oynadılar və rəqibin qapımız qarşısında ciddi təhlükələr yaratmasına imkan vermədilər. Düzdü, bizim də çox şansımız olmadı. Amma nəzərə alaq ki, bu, yeni ildə ilk oyunumuz idi. “Atletiko”ya uduzmayan və onların Çempionlar Liqasında pley-ofa çıxmasını əgnəlləyən komandaya qarşı oynamaq xoş oldu”.
Kaleşin ilk yarının sonlarında baş hakimin təyin etdiyi penaltini bilərəkdən kənara vuran “Qarabağ”ın hücumçusu Mahir Mədətovun hərəkətinə də münasibət bildirib: “Belə hallarla tez-tez qarşılaşmırıq. Bu, “Qarabağ”ın səviyyəsindən, futbol anlayışından, qaydaları yaxşı bilməsindən və rəqibə hörmət etməsindən xəbər verir. Özünüz də gördünüz, bütün stadion, hətta bizim məşqçilər korpusu da onların bu hərəkətini alqışladı”.