Ölkə futbolu
“Neftçi” toplanışdadı, yoxsa?..
“Neftçi”nin “SKA-Xabarovsk”a 1:8 hesabl…
“Neftçi”nin “SKA-Xabarovsk”a 1:8 hesablı məğlubiyyətinin şok effekti davam edir. Klub rəhbərliyi, məşqçilər təşvişdədi, üstəlik, sponsorlar da başverənlərə biganə qalmır.
Hələlik acı məğlubiyyətin unudulması istiqamətində iş aparılır. Müxtəlif açıqlamalarla azarkeşlərin könlü alınır, ictimai fikir formalaşdırılır. Baş məşqçi Tərlan Əhmədovun üzr istəməsi isə ümumi ab-havanı bir az yaxşılaşdırıb, narazıların ürəyinə rəhm gətirib.
Lakin klub daxilində vəziyyət düzəlməyib. “Neftçi”nin güclənməsi yönündə işlər yubanır, transferlərlə bağlı heç bir addım atılmır.
Əslində, “Neftçi”nin əsl problemi də oyunçu seçimidi. Bu məsələdə rəhbərliyin dəstək verdiyi menecer Kamil Məmmədovla Tərlan Əhmədov üz-üzə qalıb. Baş məşqçi bu vəzifəyə gətirilməsində rolu olan insanların xidmətinin əvəzini ödəmək istəyir, buna rəhbərlik icazə vermir, Məmmədovun gətirdiklərini isə Əhmədov yaxın buraxmır.
Hazırda "Neftçi"də 2 futbolçu baxışdadı. Ukraynalı İqor Sikorski Əhmədovun təyinatında böyük rol oynayan Peşəkar Futbol Liqasının prezidenti Ramin Musayevin bacısı oğlu Polad Nəbizadənin kadrıdı. Mərakeş millisinin üzvü Roşti Aşente də eyni xəttlə baxışa gəlib. Kamil Məmmədov isə Argentina, Honduras, Çili və Braziliyadan olan əcnəbiləri təklif edib. Əhmədov transferlərə “hə” dedikdə hər iki cəbhənin maraqlarını nəzərə almalıdı.
Bütün bu qarışıqlığın içində “Neftçi” mövsümün qalan hissəsinə hazırlaşmalı, yoxlama oyunlarına çıxmalıdı. Və hazırlıqla bağlı bütün məsuliyyət də Əhmədovun boynundadı. Ruslara məğlubiyyətlə bağlı açıqlama verməyə məcbur olan Tərlan bəy yenə hədəfdə olacaq.
Son günlər mətbuatda yazılanlarda müxtəlif istiqamətlər hiss olunur. Bir qrup rəhbərliyi günahlandırır, digərləri isə baş məşqçini top önünə qoyur. Əslində, isə problem daxili qarşıdurmaların nəticəsidi, birlik yoxdu.
Transferlər, hazırlıq planı bir yana komandanın idarə olunmasında da problemlər var. Komanda toplanışa yığışmış təsiri bağışlamır. Futbolçuların “SKA-Xabarovsk”la oyuna kimi sosial şəbəkələrdəki paylaşımları belə deməyə əsas verir. Onlar müxtəlif restoranlardan, alış-veriş mərkəzlərindən fotolar paylaşırlar. Sanki hazırlığa yox, istirahətə gəliblər.
Rəhbərlik komandaya bu şəkildə sərbəstlik verməklə səhvə yol verir. Eyni sözlər Əhmədova da aiddi. “SKA-Xabarovsk” darmadağınından sonra Əhmədovun yuxusu ərşə çəkilməliydi, lakin o, məğlubiyyəti Antalyadakı kafelərdən birində qəlyan çəkməklə unutmağa çalışıb.
Tərlan bəyin hər qələbəsindən sonra müsahibə verən, məğlubiyyətlər zamanı susan Ramin Musayev də fəallaşıb. PFL prezidenti yenə kadrının müdafiəsinə qalxıb. O, 1:8 bitən oyunu adi yoxlama oyunu kimi qələmə verib.
Qarışıq vəziyyətdədi və nələrsə düz getmir. “Neftçi” camiəsi mütləq birləşməlidi. Şəxsi münasibətləri kənara qoyub, mütləq eyni hədəfə vurmaq, bir-birinə güzəştə getmək lazımdı. Əks halda, mövsüm uğursuz bitsə, heç kim bağışlanmayacaq. Bu, hamı üçün son şansdı.
AĞA