Qriqorçukun qələbə şərhi: “Deməzdim, hansısa “partlayış” gördüm”

Antalyada təlim-məşq toplanışı çərçivəsində Makedoniya “Rabotniçki”si ilə yoxlama görüşündə 2:1 hesablı qələbəylə bitən matçdan sonra “Qəbələ”nin baş məşqçisi Roman Qriqorçuk fikirlərini bölüşüb. Futbolinfo.az xəbər verir ki, Sport24.az-a danışan ukraynalı mütəxəssis bir sıra onu razı salan məqamlara toxunub.

– Antalya toplanışında ilk qələbəni qazandınız. Yetirmələrinizin oyunu sizi qane etdimi?
– İlk növbədə onu qeyd edim ki, futbolçuların hər birinə planlaşdırdığımız qədər oynamaq imkanı yaratdıq. Milli komandaya namizədlərə daha çox oynamaq imkanı yaratdıq. Çünki ayın 27-dən bizimlə olmayacaqlar və yığmanın düşərgəsinə daha hazırlıqlı yollanmalarını istəyirdim. Milliylə bağlı belə danışığımız olub ki, futbolçularımız ayın 30-da baş tutacaq yoxlama oyununda iştirak etdikdən sonra sıralarımıza dönəcəklər. Bilavasitə oyuna gəlincə, hesab edirəm ki, ənənəvi olduğu kimi, bu yoxlama oyunundan da lazımi informasiyanı ala bildik. Zənnimcə, topladığımız müsbət informasiya az olmadı. Hər şey işgüzar rejimdə davam edir.

– Cavabınızdan belə başa düşdük ki, Kosovo ilə yoldaşlıq görüşünün ləğv olunduğundan xəbərsizsiniz.
– Deməli, klubumuz üçün lap əla. Düşünmürəm ki, qısa zaman kəsiyində milliyə daha bir rəqib tapmaq mümkün olsun.

– Antalya toplanışındakı ilk 2 oyunla müqayisə aparsaq, yetirmələrinizin daha yaxşı çıxış etdiyini düşünmürsünüz?
– Deməzdim, hansısa “partlayış” gördüm. Yaxşı oynadıq, amma digər görüşlərdə də yaxşı qol imkanlarımız olmuşdu. Bugünkü matçda məni ən çox razı salan məqam planlaşdırdığımız kimi, bütün oyunçulara şans tanımağımız oldu.