Namiq Ələsgərov: “Finala çıxmaq üçün hər şeyi edəcəyik”

Topaz Premyer Liqasının 22-ci turunun “Neftçi” – “Sumqayıt” (2:2) oyunundan sonra paytaxt klubunun yarımmüdafiəçisi Namiq Ələsgərov jurnalistlərin suallarını cavablandırıb.

– Nəticə sizi nə razı saldı?
– Qalib gəlmək istəyirdik. Qələbə bizim üçün çox vacib idi. Çünki 3-cü və 4-cü yerdəki komandalara yaxınlaşmaq istəyirdik. Amma alınmadı.

– Bunu əldən verməyinizə səbəb Cavid İmamverdiyevin ustalığı, yoxsa sizin ani diqqətsizliyiniz idi?
– Hər iki amil rol oynadı. Cavid çox yaxşı qol vurdu. Qismət belə imiş.

– Bu nəticə kubok oyunu öncəsi sizə mənfi təsir göstərməyəcək ki?
– Qələbə qazansaydıq, daha yaxşı olardı. Çempionatda da hələ heç nə bitməyib. Uduzsaydıq, vəziyyət daha pis olardı. Hələ şansımız davam edir. Kubok görüşünə yaxşı hazırlaşacağıq.

– “Qəbələ” ilə kubok oyunundan sonra çempionatda “Zirə” ilə üz-üzə gələcəksiniz. Ardıcıl iki oyun çətin olmayacaq?
– Ağır olacaq. İndi “Qəbələ” ilə qarşılaşmanı fikirləşirik. Ondan sonra “Zirə” barədə düşünmək olar.

– Kubokda həlledici amil nə olacaq?
– İstək. Bizim üçün çox vacib oyundu. Finala çıxmaq üçün hər şeyi edəcəyik. Kim daha çox istəsə, o da qalib gələcək.

– Qış fasiləsindən sonra “Qəbələ” enişdə, siz isə yüksəlişdəsiz. Bu, "Neftçi"yə üstünlük verirmi?
– Çempionatla kubok tam ayrı yarışdı. “Qəbələ” də bütün diqqətini kuboka yönəldib. Hər iki komanda üçün çətin olacaq.

– Qış fasiləsindən əvvəl Tərlan Əhmədov sizin oyununuzun alınmadığını deyirdi. Yanvardan bəri nə dəyişdi ki, daha yaxşı forma yığdız?
– Özünəinamla bağlı idi. Daha inamsız çıxış edirdim. Azarkeşlərin, məşqçilərin mənə güvəndiklərini hiss edirəm.

– Bu gün “Sumqayıt” güclü idi, yoxsa siz yetəri qədər istəkli deyildiz?
– İstəkli idik. “Sumqayıt” çox yaxşı komandadı, Avropa Liqası uğrunda yarışır. Hər iki komanda yaxşı mübarizə apardıq. Əsas odu ki, uduzmadıq.

– Cavid İmamverdiyev qol vuranda bunu qeyd etmədi. Belə halları necə qarşılayırsız?
– Normal. “Neftçi”nin yetirməsidi, neçə il bu komandada oynayıb. Dünya futbolunda da belə şeylər çox olur.