Ölkə futbolu
3-cü pillədəki… autsayder
Topaz Premyer Liqasında bürünc medallar, eyni zamanda Avrop…
Topaz Premyer Liqasında bürünc medallar, eyni zamanda Avropa Liqasına vəsiqə uğrunda mübarizə daha kəskin xarakter aldı. “Sumqayıt”ın növbəti dəfə büdrəməsi “Zirə”nin 2018-də ilk qələbəsini qazanması ilə üst-üstə düşüncə “Neftçi”nin “Qarabağ”la bugünkü oyununun dəyəri daha da artdı. Xal itkisi bakılılar üçün ciddi problemə səbəb ola bilər.
Düzdü, “Neftçi”nin əsas rəqibləri son turda bir-biri ilə qarşılaşacağından, paytaxt klubunun ən azı 4-cü yerə ümidi çoxdu. Amma bu pillə avrokuboka vəsiqə üçün yetərli olmaya bilər. Ölkə kubokunun finalında “Qəbələ”nin qələbəsini arzulamaqdansa, bürünc medalı təmin etmək gərəkdi.
“Zirə”nin bu qələbəsi komandaya ciddi ruh yüksəkliyi verəcək. Növbəti tur evdə “Kəpəz” üzərində qələbə real görünür, bu isə sumqayıtlıların təşvişini artıracaq. Düşüşün qarşısını ala bilməyən Samir Abasov, bu gedişlə rəqiblərə yenə aşağıdan yuxarı baxmalı olacaq. Düzdü, hazırda “Sumqayıt” hamıdan öndədi. Lakin psixoloji gərginlik bu komandanın ayılmasına imkan vermir.
Riad Rəfiyevin prezident postuna gəlişindən sonra “Sumqayıt” daha pis durumdadı. Görünür, o, rəhbər kimi nüfuz sahibi deyil, kluba kənardan müdaxilələr aşkar görünür.
Məsələn, “Sumqayıt” turun açılış matçına çıxırsa, bu, hansısa planın tərkib hissəsidi və Rəfiyev bunun qarşısını ala bilmir. Komanda ötən tur bağlanış matçının iştirakçısı olubsa, 7-8 gün istirahət edən rəqiblərindən fərqli olaraq, cəmi 5 gün ötən kimi meydana çıxmamalıydı. Ümumiyyətlə, oyunların daha çox eyni vaxtda keçirilməsinə ehtiyac duyulduğu bir vaxtda “kimyaçılar”ın cümə günü oynaması birbaşa klub rəhbərliyinin zəifliyinin nəticəsidi.
Samir Abasov da təslim olana oxşayır. Hər xırda səhvə görə çılğıncasına etiraz edən baş məşqçi sanki susdurulub. Bəlkə də onun başı komanda daxilində satqın axtarışına qarışıb. Bəzi oyunçuların əvvəlki kimi oynamadığı aşkar görünür. Abasovun əlinin altında kifayət qədər futbolçu olmadığından, o, heyətdəkilərə güvənməyə məhkumdu. Hətta ehtiyata atdıqlarını da ikinci hissədə oyuna buraxmağa məcbur olur. Onlar isə…
Heç kimi ittiham etməyəcəm, amma məncə, Tural Axundov 2 turdu “Sumqayıt” üçün oynamır. Artıq başqa klublarla razılaşdığı deyilən müdafiəçinin srağagün meydanda olduğu vaxtdakı hərəkətlərinə diqqət edin. Bir epizodda hücumu aşkar ofsaydda olan futbolçuya ötürməylə məhv edir; digərində künc zərbəsindən topu nümayişkaranə şəkildə auta vurur; üçüncüdə isə son saniyələrdə qazanılan cərimə zərbəsi zamanı cərimə meydançasına asma əvəzinə, meydanın mərkəzinə gərəksiz ötürmə göndərir. Belə komandanın qələbə qazanması mümkünsüzdü.
Təbii ki, Abasov bütün bunları görməyəcək qədər axmaq deyil, lakin o, məğlubiyyətlə çoxdan barışıb. İndi sadəcə, mövsümü yola verir və yayda gedəcəyi komandanı düşünür. Necə ki, bir çox yetirməsi də eyni əhval-ruhiyyədədi. “Sumqayıt” avrokuboklara iddialı “üçlük” arasında hazırda lider olsa da, əslində, ən real autsayderdi.
Məhz bütün bu amillər “Zirə”nin yenidən önə çıxmasına imkan verə bilər. Qalır 3-4-cü pillələri “Neftçi”ylə necə bölüşdürməyə, bunda “Qarabağ”ın bugünkü oyuna hansı motivasiya ilə çıxması böyük önəm kəsb edəcək. Amma məhz bürünc medalı təmin etmək çox önəmlidi. Çünki “Keşlə”nin kubokda sürpriz etmək ehtimalı az deyil. Yuri Maksimovun yetirmələri 2018-də keçirdiyi bütün matçlarda (12 çempionat, 2 kubok – red.) qol vurub və onlar titul üçün hər şey edəcəklər.
FƏRİD
- Ölkə futbolu2024-05-22 10:32
“Səbail”ə sponsor zərbəsi: büdcə azaldıldı
- I Liqa2024-05-22 18:22
“Şamaxı” I Liqanın qalibi oldu
- Müsahibə2024-05-23 08:00
Aleks Souza: “Menecerim danışmamağı tapşırıb”
- Ölkə futbolu2024-05-21 16:00
“Qarabağ”ın ÇL-in yeni mövsümünə 2-ci mərhələdən başlaması ehtimalı böyükdür” – Asif Əsgərov