Ölkə futbolu
Elxan Məmmədov Media Komitəsini “oyuncaq” edib
2 il əvvəl AFFA-nın baş katibi Elxan Məmmədovun təşəbbüs…
2 il əvvəl AFFA-nın baş katibi Elxan Məmmədovun təşəbbüsü ilə yaradılan AFFA yanında Media Komitəsi də baş katibin uğursuz layihələri sırasına qoşulmaqdadır. Komitənin ilk rübündə işlər qaydasında getsə də, sonradan AFFA-dan lazımı diqqət və dəstək görülmədiyi üçün, həmçinin komitədən baş katibliyə ünvanlanan təkliflərə ya baxılmadığı, ya da çox gec cavab verildiyi üçün narazılıqlar yaranmağa başladı.
Nəticədə irəliyə heç bir addım atılmayınca ardıcıl istefalar oldu.
Ordan ilk istefa verənlərdən biri də "FutbolPress" idi və istefanın səbəblərini də dəfələrlə qeyd etmişik.
Ümidimiz var idi ki, Media Komitəsində islahatlar aparılacaq, operativlik olacaq. Ancaq əksi baş verdi. Hazırda bu komitə də digərləri kimi görk üçün mövcuddur.
Dünən İcraiyyə Komitəsinin iclasından sonra keçirilən brifinqdə baş katib müzakirə olunanlar və qərarlar haqda məlumat verərkən MK haqda heç bir qeyd etmədi. Komitənin hazırkı İdarə heyətindən də bu barədə sual verən olmayınca, məsələ yenə açıq qaldı. Halbuki:
07.03.2018-ci il tarixində keçirilən AFFA-nın İcraiyyə Komitəsinin iclasında verilən qərarlar arasında belə bir bənd var:
4. AFFA-nın yanında Media Komitəsinin yeni formatda fəaliyyəti ilə bağlı müzakirələrin aparılması katibliyə həvalə olunsun və İcraiyyə Komitəsinin növbəti iclasına təkliflər təqdim olunsun.
Həmi iclas dünən keçirilən idi. Qeyd etdiyimiz kimi, baş katib brifinqdə bu haqda heç bir məlumat vermədi.
Beləliklə, Media Komitəsinin nə məqsədlə yaradıldığı, inkişaf perspektivləri tamamilə şübhə altına alındı.
P.S.
Komitənin "feysbuk" səhifəsində verilən elana əsasən, İdarə Heyti ilə üzvlər arasında görüş təklif edilmişdi və sırağagün keçirilən görüşdə elə ciddi qərarlar qəbul ediməyib. Ümumiyyətlə, səlahiyyət müddəti martın sonunda bitmiş İdarə heyəti bu elanla yanlışa yol vermişdi. Həmin heyət artıq legitimliyini itirib. AFFA-nın, konkret bu işləri koordinasiya etməli olan baş katibin bilərəkdən səhlənkar, saymazyana yanaşması nəticəsində proses uzanır və yeni formatın, yeni İH-nın tərkibi məlum olmur. Nə qədər komitədəkilər bu saymazlığa reaksiya vermir. Tam bir anormallıq səhnəsi…
Futbolpress