Karikari: “Onların 2-ci heyətlə oynaması bizim problem deyil”

“Neftçi”nin hücumçusu Kvame Karikari Topaz Premyer Liqasının 3-cü turu çərçivəsində qarşılaşdıqları “Qarabağ”la oyundan sonra futbolinfo.az saytına müsahibə verib:

– “Qarabağ”la matçı sizin üçün uğurlu saymaq olar?
– Çox yaxşı oyun oldu. Xeyli qol şansımız oldu. “Qarabağ” da həmçinin kifayət qədər epizod yaratdı. Sonda 1:1-lik heç-heçə oldu, amma fərqli hesab ola bilərdi. Düşünürəm ki, çempionata yaxşı başlamışıq. 

– Matçda qol müəllifi oldun…
– Buna görə Allaha təşəkkür edirəm. Ümid edirəm ki, davamı gələcək. 

– Amma bir neçə epizodda da fərqlənə bilmədin. Bunu adaptasiya problemi, yoxsa bəxtsizliklə əlaqələndirərdin?
– Düzdü, bir neçə yaxşı şans qazandım. Hansı ki, onların sonluğu daha yaxşı ola bilərdi. Amma bu, futboldu. Belə hallarla qarşılaşmalısan. Mən hələ o qədər də yaşlı deyiləm və öyrənməyə davam edirəm. İnşallah, növbəti oyunlara daha yaxşı hazır olacam. 

– “Neftçi” tam gücü ilə oynayır, yoxsa hələ əsl “Neftçi”ni görməmişik?
– Komandamız getdikcə daha da güclənir. Əlbəttə ki, bizə zaman lazımdı. 3 oyunda fərqli komandalar görmüsüz. Getdikcə daha yaxşı oynamışıq. Hazırda komandada hər şey pozitivdi və biz yaxşı komandayıq. 

– 3 oyuna 7 xal “Neftçi” üçün əla nəticə sayıla bilər?
– Bu, yaxşı nəticədi.

– Çempionluq üçün daha nələr lazımdı?
– “Neftçi” çempionluq üçün tək oynamır. Bütün komandalar birinci olmaq üçün mübarizə aparır. Hər komanda gücünü göstərməyə və xallar əldə etməyə çalışır. Biz də bunun üçün çalışırıq və sonda qalib olmaq istəyirik. Hər oyunda qələbə bizi buna daşıyacaq. 

– Birincilik üçün həmişəki kimi “Qarabağ” əsas rəqibdi. Dünən sizə qarşı bir çox əsas futbolçularını meydana buraxmayan komandaya uzun marafonda qalib gələ biləcəksiz?
– Kim əsas heyətlə, kimsə ikinci heyətlə meydana çıxırsa, bu, bizim problemimiz deyil. Bütün komandalara qarşı yaxşı oynamağa, xallar qazanmağa çalışırıq. 

– Növbəti oyununuz 3 matçda 1 xal qazanan “Keşlə”yə qarşı olacaq…
– Bizim üçün çox vacib oyun olacaq. Rəqibin nəticələri o qədər də maraqlı deyil və biz sadəcə, ciddi olmağa çalışırıq. “Keşlə” yaxşı komandadı və biz onlara qarşı tam hazır olmalıyıq.

AĞA