“Futbolçuları nə qədər müdafiə etsəm də, nəticə göz qabağındadı”

Avropa Liqasında qrup mərhələsinin 3-cü turu çərçivəsində doğma “divarlar arası”nda Ukrayna “Vorskla”sına 0:1 hesabı ilə məğlub olan “Qarabağ”ın baş məşqçisi Qurban Qurbanov mətbuat konfransı keçirib.

Futbolinfo.az xəbər verir ki, 46 yaşlı mütəxəssis əvvəlcə oyun haqda fikirlərini bölüşüb:

– Qalib gəlmək istəyirdik. Üzgünük. Rəqib müdafiədə diqqətli oynadı. Buna baxmayaraq, qol epizodlarımız oldu. “Vorskla” isə qapıya bir zərbə vurdu. Bu cür görüşlərdə futbolçularımız daha çox düşünməlidi. Bəzi anlarda istədiklərimiz alındı. Amma qol epizodlarımız oldu. Futbolçuların üzərinə getməyin əleyhinəyəm. Sıx qrafikdə oynayırıq. Başqa yolumuz yoxdu, qarşıdakı oyunlar barədə düşünməliyik.

– Qol epizodları yaranır, amma istifadə edilmir. Komanda “qara zolağ”a düşüb, gərginlik yaranıb, yoxsa bu, yorğunluqdu?
– Bu cür qrafikdə oynamaq futbolçuları yorur. Bəlkə də ustalıq səviyyəsi çatmır. Dünən “Atletiko”nun 0:4 məğlub olduğu oyuna baxırdım. Yəqin razılaşarsınız ki, nəticə oyuna görə deyildi. Belə hallarda futbolçulara bildirmişəm ki, alınmayanda, daha çox çalışmalısan.

– Buraxılan qolda qapıçının səhvi daha çox idi, yoxsa müdafiənin?
– Görünən budu ki, top 30 metrlikdən vurulmuşdu. Bu cür topları qapıçı tutmalıdı. Nə qədər diqqətli olsan da, rəqib müəyyən anlarda qol epizodu yaradır. Ancaq bu cür səhvləri ilk dəfə deyil görürük.

– Son illərin ən zəif avrokubok mövsümünü keçirirsiz. Transferlər nəzərə çarpmır, Qara ilə Maksim də uğursuz oynayırlar. Razısız ki, komanda ötən illə müqayisədə geriləyib? 
– Futbolçuları nə qədər müdafiə etsəm də, nəticə göz qabağındadı. Futbolçular, xüsusilə, millinin oyunçuları 3 cəbhədə vuruşurlar. Qara və Maksimin oyun qrafikinə baxsaq, necə yükləndiklərini görərsiz. Bu cür oyunlarda müdafiə və orta xətt oyunçularının səhvi nəzərə çarpır. Hər bir komandada bu cür hallar olur ki, daim işləsə də, uğursuzluqdan qurtula bilmir. Lakin həvəsdən düşmək olmaz. Əksinə, daha da əzmlə işləməliyik. Bizdən qat-qat böyük klublar da bu cür duruma düşüblər. Futbolçularıma güvənirəm və onların yanındayam. 

– Hannes Halldorssonu dekabrın sonunadək görə bilərikmi?
– Təbii ki, hər qapıçımızı görə bilərsiniz.

– Mahiri oyuna daxil edərkən Emeqaranı yox, müdafiəçini çıxarıb 2 hücumçuyla oynamaq olmazdımı?
– Maksimlə Donald onsuz da müdafiədən çox hücumda olurdular.

– Dəyişikliklər özlərini doğrultdu?
– Nəticə baxımından yox. Ancaq əvəzetmələrdən sonra xeyli sayda qol epizodu yaratdıqsa, deməli, onlar oyunu gücləndirdi və matça sonradan daxil olanlardan razı qaldım. (Sport24)