“Neftçi” Karikarini yola salmaq istəyir

Qışda minimum 3 əcnəbi almağı planlaşdıran “Neftçi” artıq Mamadu Mbodju sıralarına qatıb. Seneqallı mərkəz müdafiəçisi komandanın bu mövqedəki problemini yoluna qoymalıdı. Ruslan Abışovun zədəsini sağaltması ilə vəziyyət daha da yaxşılaşacaq.

Futbolinfo.az xəbər verir ki, bakılılar digər 2 transferi hücum xəttinə və yarımmüdafiəyə planlaşdırıb. Lakin bunun üçün büdcə yetərsizdi və rəhbərlik heyətdəki əcnəbilərdən ən azı biriylə yolları ayırmalıdı.

Əldə etdiyimiz məlumata görə, vidalaşmaq planlaşdırılan oyunçu Kvame Karikaridi. Heyətə düşə bilməyən hücumçu oynadığı matçlarda da heç nəylə yadda qalmayıb. Baş məşqçi Roberto Bordini razı salmayan bu futbolçunu yola salmaq planlaşdırılır. Karyerası boyunca heç bir komandada bir ildən çox qalmayan 26 yaşlı forvard 14 klub dəyişib.

Amma 2020-ci ilin iyununa kimi anlaşması olan Karikarini yola salmaq da asan olmayacaq. Ona ya kompensasiya ödənilməlidi, ya da müəyyən məbləğ müqabilində qarşılıqlı razılıqla yola salınmalıdı. İstənilən halda, faydasız legioner göndərilməlidi ki, daha yaxşı futbolçu gətirmək mümkün olsun.