Ölkə futbolu
Erkən finalın ilk pərdəsi: “Qarabağ” 2019-da ilk məğlubiyyətini aldı
Gələn mövsüm sıradan, ortabab bir komanda olacağını n?…
Gələn mövsüm sıradan, ortabab bir komanda olacağını nəzərə alsaq, cari ölkə kuboku “Qəbələ”nin son ümididi. Tale Heydərovun vaxtında heç bir titul qazanmayan “qırmızı-qaralar” bəlkə Fariz Nəcəfovun prezidentliyi dövründə tilsimi qırdı.
Lakin hələ titiuldan danışmaq üçün tezdi. Yarımfinalın ilk matçında “Qarabağ” üzərində qələbə yalnız yolun yarısının qət edilməsidi. Bakıda cavab matçı var və güclü rəqibin təzyiqinə davam gətirmək lazım olacaq.
Bu mövsüm “Qəbələ” “Qarabağ”ın aşkar qapazaltısı idi. Düzdü, əyalət klubu üçün ağdamlılara qol vurmaq heç vaxt problem olmayıb, lakin ümumi statistikada hər şey Qurban Qurbanovun yetirmələrinin üstünlüyündən xəbər verir. Ona görə kubokda da cavab matçını gözləmək lazımdı.
1:0 əla nəticədi. Evdə top buraxmadan qalib gəlmək bir yana, çempionatda hamıdan çox fərqlənən rəqibi bundan məhrum etmək psixoloji üstünlükdü. Ağdamlıların 2019-da ilk məğlubiyyətini alması da qeyd edilməlidi. Bakıda qonaqların bir qolu çox şeyi dəyişəcək. Hər şey oyuna köklənməkdən, matça necə başlamaqdan asılı olacaq.
Bügünkü oyunun ilk hissəsi cansıxıcı idi. Ehtiyatlı oynayan rəqiblər bir-birinin səhvini gözləyirdi. O səhv ikinci hissədə reallaşdı. Və Ceyms Adeniyi milli komandanın 2 müdafiəçisini – Maksim Medvedevlə Bədavi Hüseynovu bir-birinə qatıb, qələbə qolunu vurdu. Sənan Qurbanovun riskli əvəzləmələri, oyunçu yerdəyişmələri həm tempin yüksəlməsinə, həm də hesabın açılmasına səbəb oldu. Ayağını sürüyən Stiven Monrozun bacarmadığını Ceyms qısa zamanda reallaşdırdı. Cavid Hüseynov isə ehtiyatda qalmasının hirsini çıxdı.
Bir məğlubiyyətə görə “Qarabağ”ı siyahıdan silmək olmaz. Amma hətta zəngin heyətin də 2 cəbhədə mübarizə aparmaq üçün yetərli olmadığı bu gün aydınlaşdı. Əsas heyətin bir neçə futbolçusuna istirahət verilincə komanda əzəmətini itirdi.
Hər şey Bakıda həll olunacaq. “Qəbələ” rəqibindən – birinci oyundakı kimi – qorxmasa, uğurlu sonluğa ümid edə bilər. Yox, “Qarabağ”a öz futbolunu oynamağa imkan versələr, Naxçıvana ağdamlılar gedəcək. İstənilən halda, cavab oyunu erkən final olacaq.
FƏRİD