Ölkə futbolu
“Səbail”in dərsi
Gözlənilən nəticədi, əksinə, mərhələni “Səbail&rd…
Gözlənilən nəticədi, əksinə, mərhələni “Səbail” keçsəydi, bu, sensasiya olardı. Avropa Liqasının debütantı olan təmsilçimizin rəqibi də güclü idi. “Universitatya Krayova” hətta daha iddialı klublarımız üçün çətin rəqib sayılırdı.
Bununla belə, Rumıniyadakı oyun göstərdi ki, bu rəqibi keçmək olardı. Təcrübəsizlikdən irəli gələn həlledici səhvlər, klubdaxili problemlər, baş məşqçinin işinə müdaxilələr sonda hər iki oyunda məğlubiyyətlə nəticələndi.
Hər şey ilk oyunda tar-mar oldu. Rəhbərlikdəki bəzi şəxslərin israrla Maykl Essyeni start heyətinə saldırması Bakıda məğlubiyyətə gətirib çıxardı. Layiq olmadığı halda həddindən çox yüksək maaş alan və bu səbəbdən əsas heyətdə oynaması vacib sayılan qanalı meydanda olduğu zaman ərzində rəqibin işinə yaradı. “Dənizçilər” faktiki bir nəfər azlıqda oynadı və nəticədə 2:3 hesabıyla yenildi. Orta sahəni bu qoca legionerin fəaliyyətsizliyi üzündən ələ keçirən rumınlar hətta böyükhesablı qələbəyə də nail ola bilərdi. Amma baş məşqçi Aftandil Hacıyev onu əvəz edəndən sonra bəzi yerli futbolçuların əzmkarlığı abırlı hesaba səbəb oldu.
Səfərdə alınan 2:3 hesablı məğlubiyyət isə artıq ilk oyunun fəsadlarının nəticəsi idi. Vəziyyəti bərabərləşdirmək, möcüzəyə nail olmaq üçün irəli atılan “Səbail” ardıcıl 2 qol buraxdı və durumu daha da pizləşdirdi.
İnsaf naminə, Aftandil Hacıyev bu dəfə daha yaxşı heyət seçmiş, taktikanı rəqibə uyğun qurmuşdu. Bu səbəbdən hətta 0:2 geridə olarkən də komanda oyundan qopmadı, mübarizə apardı. Rumın klubuna 2 oyunda 4 top vurmaq təsadüf ola bilməz. “Səbail” çox çətin vəziyyəti dəyişə, hesabı bərabərləşdirə bildi. Oyunu əlavə vaxta daşımaq üçün qələbə qolu arayış zamanı isə müdafiədə ani səhv buraxıldı və əks-hücumdan sonra ilk matçdakı hesab təkrarlandı. Bəlkə də son dəqiqələri ehtiyatlı keçirib, ölkə adına reytinq xalları qazanmaq olardı, lakin “dənizçilər” haqlı olaraq qələbəyə can atdılar, təəssüf ki, müdafiədə azlıqda yaxalandılar və fərdi səhvdən sonra top buraxdılar.
Essyeni komandaya faydalı olmaq üçün gətirənlər yəqin, indi səhvlərinin fərqindədi. Şou, reklam həvəsinə düşüb, avrokubokda mərhələ adlamaq şansını əldən verdilər. Cavab matçında ehtiyatda əyləşən Mayklın yoxluğunda “Səbail” daha mobil təsir bağışladı, rəqiblə başabaş mübarizə apardı.
Bildiyimizə görə, Essyenlə bağlı klubda ciddi narazılıq olub. Əksər futbolçular qanalının start heyətdə oynamasının əleyhinə çıxıb, meydanda onun da əvəzində işləməyəcəklərini bildiriblər. Belədə məşqçilər heyətinin işi rahatlaşıb, rəhbərliyə kollektivin narazılığı çatdırılıb. Essyenlə bağlı tapşırıq təkrarlanmayıb və komanda normal futbolunu sərgilədi. Hacıyevsə qiyamçıların lideri olan kapitan Eltun Yaqublunu son dəqiqələrdə meydana buraxmaqla bir növ təşəkkürünü çatdırmağı lazım bildi. Lakin bu addım yanlış, Essyenin sifarişçilərinə eyni üsulla cavab idi və futbol tanrısı cəzasını yubatmadı. Komanda bəlkə də qələbəyə nail olacaqdı, lakin qeyri-rəsmi vitse-prezident olan Eltun meydana çıxan kimi rumınlar qələbə qolunu vurdu.
Bu oyunlar “Səbail”ə dərs oldu. Rəhbərlik məşqçiləri qınaya bilməz, hər şeyin səbəbkarı özləridi. Yüksək məbləğdə maaş alır deyə oynadılan Mayklın üzündən əla şans qaçırıldı. Hər nə qədər müəyyən addımları diqtə ilə atsa da, Hacıyevi alqışlamalıyıq. Azərbaycan futbolu onun simasında yaxşı məşqçi qazanmaqdadı. Tam səlahiyyət sahibi olsa, xarakteri ilə əla, döyüşkən komanda formalaşdıra biləcək.
FƏRİD