Ölkə futbolu
Ərəblərin Bakı hazırlığı: ilk addım atıldı
Ərəblər Azərbaycana ancaq turist kimi gəlmir. Bu ildən etibarən…
Ərəblər Azərbaycana ancaq turist kimi gəlmir. Bu ildən etibarən ölkəmiz futbol klublarının da maraq dairəsindədi.
Futbolinfo.az xəbər verir ki, ilk dəfə hansısa xarici ölkə klubu təlim-məşq toplanışı keçmək üçün ölkəmizə gəlib. Küveyt “Əl Salmiya”sı 18 günlük hazırlıq məqsədi ilə paytaxtımızdadı. Tanınan menecer Çinar Məmmədin vasitəçiliyi ilə Bakını seçən ərəblər 4 sınaq matçı planlaşdırıb.
“Səbail”lə Bakı Olimpiya Stadionunda qarşılaşan və 1:2 hesabıyla yenilən “Əl Salmiya” qarşıdakı günlərdə bu rəqiblə daha bir matç keçirəcək. Sabah “Qəbələ” ilə üz-üzə gələcək qonaqlar “Neftçi”nin əvəzediciləri ilə də qüvvəsini sınamalıdı.
Azərbaycan klublarının Avstriya, Bolqarıstan, Türkiyəni seçməsi fonunda ərəblərin bizimkilərin bəyənmədiyi Bakıda hazırlıq keçməsinin səbəbi var. Nədənsə Türkiyəni xoşlamayan küveytlilər öz ölkələri ilə müqayisədə cənnətə düşübər. Dözülməz istilərdən qaçaraq Bakıya gələn qonaqlarımız dəbdəbəli otellərdən birində qalır, istədiyi sayda yoxlama oyunu ilə təmin olunublar. Hazırlıq keçmək üçün bir neçə variantı olan, “Bakı”nın bazasında, “Neftçi”nin təlim-məşq mərkəzində, BOS-da məşq edən ərəblər hər şeydən razıdı.
Əslində, öz klublarımızın hazırlıq keçməsi üçün də Bakıda hər şərait var. Lakin mühiti dəyişmək, kompakt yerləşərək hazırlıq keçmək üçün təmsilçilərimiz ölkə xaricinə çıxır. Ən əsas səbəb isə səviyyəli rəqib seçimidi. Ərəblərin bir komandası üçün burada rəqib tapmaq mümkün olub. Amma “Neftçi”nin əvəzediciləri ilə və 2 dəfə “Səbail”lə qarşılaşmaq heç də hamının ürəyincə deyil. Yeganə problem bundadı. Klublarımız bir-birinə bələddi, eyni zamanda çempionatda üz-üzə gələcəklərindən belə oyunlara maraq göstərmir. Xaricdə isə həm rəqib çeşidi çoxdu, həm də baxışa gələn futbolçular üçün rahatlıq var.
Bölgələrdə də belə toplanışlar təşkil etmək olar. Qəbələ məşq meydanlarının sayı baxımından ən uyğun məkandı. Yeganə problem rəqib seçimidi ki, əcnəbilərin ölkəmizə axınının qarşısını məhz bu amil alır. Əks halda, 55 yaşlı “Əl Salmiya” bizi seçən yeganə klub olmazdı.