Ölkə futbolu
3 turdan sonra: “Keşlə” yenidən səhnədə
Ötən mövsüm istisna olmaqla, son illərin oxşar, tək…
Ötən mövsüm istisna olmaqla, son illərin oxşar, təkrarlanan mənzərəsi var idi. Çempionluq mübarizəsində “Qarabağ”a “Qəbələ” əsas rəqib olur, iki klub meydanda və meydandan kənarda yekun uğur üçün hər şey edirdi.
Elə bu rəqabət onları daha da böyütdü, hər ikisi avrokuboklarda qrup mərhələsinə yüksəldi. Ağdamlılar indi də yoluna davam edir, təəssüf ki, sponsorların geri çəkilməsi ilə “Qəbələ” arzulanmayan vəziyyətə düşdü. Büdcə azalmaları zamanla nəfəs kəsdi, heyət zəiflədi, ümumi stragegiya yaddan çıxdı və…
…Və bu gün yenə Avropada qrupa vəsiqə qazanan “Qarabağ” lider, “Qəbələ” autsayderdi. Yeni mövsümün ilk 3 turunun turnir cədvəlində bu komandaların durumu çox fərqlidi:
1. Qarabağ 3 3 0 0 8-0 9
8. Qəbələ 3 0 0 3 0-9 0
Biri top buraxmadan, xal itirmədən zirvədə, digəri qola və xala həsrət son sırada.
Oxşar vəziyyəti mövsümün bitimində də görəcəyik. “Qəbələ” son pillədən qurtula bilər, amma yuxarı sıralara yüksəlmək üçün çox işləmək lazımdı. Əyalət kubu hələ yeni məşqçisini tapmalı, daha sonra oyununu nizama salmalıdı.
İlk 3 turdan sonra qələbə görməyən daha bir komanda “Sabah”dı. Az qala qızıl medallara namizəd göstərilən bakılılar mövsümə bərbad start verib. Mövsümdəki hər 2 heç-heçədə imzası olan Elşad Əhmədovun yetirmələri evdə xalsız qalmaq ənənəsini davam etdirir. Düzdü, heyət yeni yığılıb, komanda hələ formalaşmayıb. Amma əksər komandalar eyni durumdadı – bu, bəhanə ola bilməz. Məşqçilər öz yanlışlarını müəyyənləşdirməli və nəticələri yaxşılaşdırmalıdı.
İndi bəlli olur ki, “Sumqayıt”ın ilk turda qazandığı qələbəni çox şişirtmişik. “Qəbələ” hamının uda biləcəyi komandaya dönüb, ondan sonrakı rəqiblərə baxmaq lazımdı. Və burada vəziyyət xoş deyil. Ardıcıl 2 məğlubiyyət “kimyaçılar”ı autsayderlər qrupuna atıb. Oradan çıxmaq çox çətin olacaq.
“Zirə”ylə “Neftçi” 3 tura hər cür nəticə görüb. “Qartallar” heyəti komplektləşdirdikdən, oyun üslubunu oturtduqdan sonra avrokuboka vəsiqə uğrunda mübarizədə favoritlədən olacaq. “Neftçi”nin isə daxildə sabitliyə ehtiyacı var. Fasilə dönəmində klubun içində problemlər həllini tapsa, komanda yenə ən yüksək hədəflər üçün döyüşəcək. Düzdü, “Qarabağ” ötən mövsümdəkindən güclüdü və indidən liderliyi ələ alıb. Amma “Neftçi” də heyət baxımından güclənib və ağdamlıların 2 cəbhədə mübarizə apardığı dövrdə itirəcəyi xallara ümid edəcək.
Mövsümün əvvəlidi, indi komandaların real gücünə qiymət vermək olmur. Amma bəzən yaxşı start motivasiyaya çevrilir. “Keşlə” və “Səbail”dən hansının bunu bacaracağını görəcəyik. “Qarabağ”ın əsas izləyiciləri məhz çempiona uduzublar, qalan 2 matçda qələbəyə seviniblər. Ağdamlıların “Keşlə” ilə matçda necə əziyyət çəkməsi yadımızda, dünən “Səbail”i məşq edə-edə udması da gözümüzün qabağında idi.
İlk 2 turda hakim səhvlərinin də köməyi ilə büdrəməyən “Səbail”in hansı gücə sahib olduğunu dünənki matç göstərdi. Əcnəbiləri pərən-pərən salınan “dənizçilər” bəzi yerli oyunçuların əzmkarlığı hesabına ayaqda idi. Lakin “Qarabağ”la oyunda ustalıq lazım idi, bu baxımdan isə komanda axsayır. Büdcə problemləri qışa kimi komandanı rahat nəfəs almağa qoymayacaq. Aftandil Hacıyev hər nə qədər bacarıqlı məşqçi olsa da, “Səbail” ilk “üçlük”də çox qala bilməyəcək.
“Keşlə”nin işləri əla gedir. “Qarabağ”a məğlubiyyət gözlənilən idi. Hətta komanda azlıqda qalmasa, ağdamlılardan xal da almaq olardı. Digər 2 səfər matçında isə 6 xal qazanılıb. Növbəti turda “Səbail” məğlub edilsə, Tərlan Əhmədovun qurmaqda olduğu yeni komandadan danışa biləcəyik. Yox, çempionluq uğrunda mübarizə üçün tezdi, amma komanda avrokubok mübarizəsində mütləq olacaq.
AĞA
- Ölkə futbolu2024-05-10 08:00
“Yurqorden” Musa Qurbanlıya qiymət qoydu – 10 milyon kron
- Dünya futbolu2024-05-10 16:37
AÇ-2024-ün rəsmi mahnısı təqdim edildi – VİDEO
- Ölkə futbolu2024-05-10 09:21
“Əks təqdirdə fanatlar Şeydayevi qəbul etməyəcək”
- Ölkə futbolu2024-05-10 16:20
Kadinin meneceri: “Hələlik “Qarabağ”la danışmamışıq”