Premyer-liqa
Arif Daşdəmirov: İlk üçlüyə düşək, sonrasına baxarıq
“İnter”in müdafiəçisi Arif Daşdəmirov klub…
“İnter”in müdafiəçisi Arif Daşdəmirov klub saytına müsahibəsində “Rəvan”la keçirilən matç barədə danışıb, komandanın çıxışını qiymətləndirib və digər suallara cavab verib. Futbolinfo.az sizi həmin müsahibə ilə tanış edir.
– “Rəvan”la oyun kifayət qədər çətin alınsa da, komandanız qələbə qazanmağı bacardı…
– Oyun çox ağır oldu. Bundan başqa, 5 ev oyununda qələbə qazana bilmirdik və qalib gəlməyi çox istəyirdik. Biz oyunu yaxşı keçirdik: erkən qollar vurduq, yenə qol vəziyyətlərimiz oldu, lakin səhvlərimizin ucbatından lazımsız qollar da buraxdıq. Buraxılmış qollarla bağlı epizodlarda biz daha diqqətli oynamalıydıq. Əsas odu ki, bizə qalib gəlmək müyəssər oldu. Komanda artıq özünə gəlib. İnşallah, növbəti matçlarda yaxşı nəticələr əldə edərik və turnir cədvəlində yüksələrik. İlk üçlüyə düşmək istərdik, sonrasına baxarıq.
– Son matçlarda “İnter” kifayət qədər yaxşı təəssürat bağışlayır. Amma mövsümə yaxşı başladığınızı demək olmaz. Sizcə, buna başqa oyun taktikasına keçid səbəb oldu, yoxsa komanda sadəcə anladı ki, artıq geriləmək olmaz?
– Məşqçi qərara gəldi ki, belə taktikayla oynamaq lazımdı və bu sxem öz nəticəsini verdi. Biz bir neçə matçı yaxşı keçirdik, deməli, bu qərar özünü doğrultdu. Başlıcası odu ki, bu ruhda davam etməliyik. Bizə xal toplamaq lazımdı.
– Ruslan Əmircanov meydançaya çıxdıqdan sonra siz sol cinaha keçdiniz. Deyə bilərsiniz, harada sizə oynamaq rahatdı: adət etdiyiniz sağ cinahda, yoxsa sol tərəfdə?
– Bu, mənim “İnter”də artıq 4-cü mövsümümdü və ötən müddət ərzində həm sağ, həm də sol cinahda oynamağa macal tapmışam. Bu iki cinahda oynamağa adət etmişəm və məşqçi sol cinahı həvalə edən zaman burada oynamaq mənə çətin olmur. Əlbəttə ki, özümü sağ cinahda daha rahat hiss edirəm. Lakin yenə təkrar edirəm ki, zərurət yarandıqda sol cinahda oynamaq mənə hər hansı bir problem yaratmır.
– “Rəvan”la oyunda bir neçə epizodda siz hətta rəqibin qapısına yol da tapa bilərdiniz, lakin bunu etmək sizə müyəssər olmadı. Deyə bilərsiniz, həmin anlarda qol vurmağa nə mane oldu?
– Səmimi desəm, bu suala cavab verməkdə çətinlik çəkirəm. Yəqin sadəcə bəxtsizlik belə anlarda qol vurmağa imkan vermədi. Bir də hər şey o qədər dinamik cərəyan edirdi ki, daha dəqiq zərbələr endirməyə mane oldu. Növbəti matçlarda qol vurmağa çalışacağam.
– Bu qələbə sayəsində “İnter” “Qarabağ”, “Neftçi” və “Qəbələ”nin lider olduğu üçlüyə iddia edən komandalar qrupuna yaxınlaşdı. Sizin fikrinizcə, "İnter" bu komandalara yetişə bilərmi?
– Əlbəttə ki, biz bunu edə bilərik. “İnter” həmişə mükafat yerlərinə iddia edən komandadı. Son matçlarda biz yaxşı oyun nümayiş etdiririk və düşünürəm ki, bizə bu ruhda davam etmək lazımdı. Komanda meydançada bütün potensialını nümayiş etdirməlidi. Bizə səhvlərdən qaçmaq lazımdı və yalnız bu halda turnir cədvəlində yuxarı yerlərə ümid edə bilərik. Yalnız bu halda biz irəliyə addımlaya bilərik.
– Növbəti tur komandamızı Zaqatalaya çətin səfər gözləyir. Birinci dövrədə “İnter” “Simurq”a məğlub oldu və çox güman komanda revanş almağa çalışacaq. Qarşıdakı oyun barədə nə deyə bilərsiniz?
– Bizi çox ciddi oyun gözləyir. “Simurq” ötən bütün matçlarını Bakıda və Qəbələdə keçirdi, bizimlə matçı isə ilk dəfə azarkeşlərinin qarşısında keçirəcək və bu da bizim tapşırığımızı daha da çətinləşdirəcək. Ancaq biz revanş götürməyə və Zaqataladan yaxşı nəticəylə qayıtmağa çalışacağıq.