AFFA vacib qərarlar vermək ərəfəsində: “Şamaxı” hələ də ümid edir

AFFA rəhbərliyi tezlklə növbəti mövsümlə bağlı qərarlarını verməlidir. İyunun 16-da İcraiyyə Komitəsinin iclası olacaq və növbəti mövsümdə Premyer Liqada klub sayı dəəqiqləşəcək.

Əslində, sayın dəyişməyəcəyi çoxdan aydınlaşıb, sadəcə, bunun rəsmiləşməsi qalır. “Şamaxı” Premyer Liqada qalmaq üçün hələ də müxtəlif vasitələrlə təzyiq edir, sayın artırılmasına çalışır. Belə olduqda onlar I Diviziona düşməkdən qurtula bilərlər. O zaman elitaya yüksəlməsi rəsmiləşən “Araz-Naxçıvan”la yanaşı, “Zaqatala”nın da yolu açıla bilər.

Lakin AFFA bugünədək qərarında qətidir. Qurum rəsmiləri liqalara arasında əvəzetmələri reallaşdırmaq, çoxdan unudulan idman prinsiplərinə əməl olunmasını istəyir. Klub sayının artırılması maliyyə çətinliyinə görə mümkün olmadığından, yəqin ki, “Şamaxı” aşağı dəstəyə yollanmağa məcbur olacaq. Bölgə təmsilçisini yalnız problemlərini tam həll edə bilməyən naxçıvanlıların mümkün imtinası xilas edə bilər.

Amma bu, çox zəif ehtimaldır və cümə günü gözlənilən qərarlar verilməlidir. Əldə etdiyimiz bilgiyə görə, Premyer Liqada klub sayının artırılmas yalnız qarşıdakı mövsümlər üçün mümkündür. O da yalnız müzakirələrdən, gedişatdan, klubların durumundan asılıdır.

Hazırda AFFA-da əsas məsləhətləşmələr I Divizionda iştirak edəcək 10 komandanın müəyyənləşdirilməsi və II Divizionun təşkili üzərində aparılır. Bir çox komandanın fərqli problemləri var və onların həllinə çalışılır. Yəqin ki, son müzakirələrdən sonra İcraiyyə Komitəsinin Gündəliyi açıqlanacaq. Çünki iclasa 3 gün qalıb və ictimaiyyət hansı məsələlərin müzakirə olunacağını bilməlidir.