“Araz-Naxçıvan”ın gözlənilən enişi, fürsəti qaçıran tovuzlular

Hakimlikdən şikayətlənən Azər Bağırovu haqsız saymaq olmur. Konkret epizodlar var ki, “Araz-Naxçıvan”a qarşı səhvləri görmək olur. Lakin sırf dünənki oyunda komandanın məğlubiyyətinin səbəbi rəqibdən zəif oynaması idi.

Muxtar Respublika təmsilçisinin indiki aqibətlə üzləşəcəyi gözlənilən idi. Uzun fasilədən sonra Premyer Liqaya qayıdan komandanın vəzifəsi burada yerini qorumaqdır. Mövsümün ilk yarısındakı uğurlu çıxış rəqiblərin özünün sabit oynamamasının, “Araz-Naxçıvan”a ciddi yanaşmamasının nəticəsi idi. Üstəlik, heyət yaxşı yığılmışdı və qələbələr sıralandı. Həlledici məqam çatanda oyunçu sayının azlığı üzündən rəqabətssizliyin gətirdyi geriləmə özünü nəticələrdə göstərdi.

Hazırda naxçıvanlılar autsayderlər qrupunun lap yaxınlığındadır. “Kəpəz”lə 5 xallıq məsafədə dayanan “Araz-Naxçıvan” avrokuboka vəsiqə iddiasından əl çəkmək üzrədir. Əvəzində “Sabah” 5-ci pilləyə yüksəldi. Yaxşı oyun, layiqli qələbə buna imkan yaratdı. Amma “bayquşlar” sabitliyə nail olmayınca belə yerdəyişmələr çox olacaq.

“Turan Tovuz” da ilk “beşliy”ə düşə bilərdi. Ancaq qərblilər əlinə düşən gözəl fürsəti boşa verdi. Məğlubiyyətsiz seriyanın davam etməsi, Zirədə qazanılan xal qərblilər üçün uğur sayıla bilər. Oyunun gedişini, yaranmış situasiyanı nəzərə alsaq, Ayxan Abbasovun yetirmələri dünən vacib iki xal itirdi.

Hər şey qonaqlar üçün əla başlamışdı. Qəsəbə təmsilçisinin heyətlə bağlı itkiləri azmış kimi, hələ fasiləyədək daha iki əsas heyət üzvü zədə üzündən əvəzləndi. “Turan Tovuz” fürsətdən istifadə edərək hesabı açdı, ardınca meydan sahibləri azlıqda qaldı. Oyunu əks-hücumda quran qərblilər qalan vaxtda ən yaxşı bacardığı işi görüb sürətli həmlələrlə qol sayını artırmalıydı. Lakin yaxşı müdafiəsi ilə seçilən “Zirə” buna imkan vermədi, əvəzində cavab qolunu da vurdu.

İnsaf naminə, “Turan Tovuz” dünən “Zirə”ni heç kimin bacarmadığı qədər narahat etdi. Qəsəbə təmsilçisi indiyədək heç kimə bu qədər qol şansı verməmişdi. Qərblilərin inamlı oyununun nəticəsiz qalmasının səbəbi rəqib qapıçı idi. Ardıcıl seyvlər zirəli futbolçuları ruhlandırdı və onlar oyunu bərabərləşdirməyi bacardılar. 10 nəfərlə xal qazanmaq bəlkə də qələbəyə bərabər sayılmalıdır.

O da var ki, bu xalı meydan sahiblərinə Şəhriyar Əliyevin uşaq səhvi qazandırdı. “Turan Tovuz” qolu rəqibə hansısa epizod verməklə deyil, kapitanın yersiz hərəkəti üzündən bağışladı. Bu mövsüm azı 8-9 xalı Şəhriyarın fərdi səhvlərindən sonra itirən qonaqlar yenə eyni aqibəti yaşadı.

Cari mövsümdə oyunun ilk 10 dəqiqəsində 4, son 10 dəqiqəsundə 6 qol vuran qərblilər, erkən fərqlənmə ənənəsinə sadiq qalsa da, oyunun sonlarında bunu bacarmadı. Və yekunda tərəflər xal bölüb aralarındakı fərqi qorudu. “Zirə” ilk “dördlük”də qalmaq üçün mübarizəyə davam edir, tovuzlularsa, autsayderlər qrupundan uzaqlaşıb imkn daxilində yuxarı sıralarda qalmağa çalışır.

AĞA