“Azərbaycan futbol oynamaq üçün çox yaxşı ölkədir”

“Kəpəz” klubunun braziliyalı futbolçusu Martins Juniorun futbolinfo.az saytına müsahibəsi

– Qış fasiləsindən sonra Misli Premyer Liqasında keçirdiyiniz ilk oyunda “Turan Tovuz”a 2:1 hesabı ilə qalib gəldiniz. Bu, cari mövsümdə Qərb derbisində ilk qalibiyyətiniz oldu…

– 2024-cü ilə qələbə ilə başlamaq çox yaxşı oldu. Vacib qalibiyyət qazandıq və buna görə bütün komanda yoldaşlarımı təbrik etdim. Bu nəticəyə birlikdə imza atdıq. Sizin də qeyd etdiyiniz kimi, cari mövsümdə derbidə ilk qələbəmiz oldu.

– Çempionatdakı növbəti oyununuz “Qarabağ”a qarşı olacaq. Liderlə matçdan hansı nəticəni gözləyirsiniz? Sensasiyaya imza atmağa gücünüz çatacaq?

– Bizi möhtəşəm komandaya qarşı böyük oyun gözləyir. Ancaq rəqibdən çəkinmirik. “Qarabağ”la oyuna tam hazırıq. Meydana qalib gəlmək üçün çıxacağıq.

– Adil Şükürovun baş məşqçi postuna gəlişindən sonra “Kəpəz” inamlı çıxış etməyə başlayıb. Şükürov haqda hansı fikirdəsiniz? Bir məşqçi kimi ən çox hansı xüsusiyyətini bəyənirsiniz?

– Adil Şükürov əla məşqçidir. O, komandaya özünəinam hissi aşılayır. Bu, hər bir oyunçu üçün çox vacibdir. Futbolçular məşqçiyə güvənəndə daha inamlı təsir bağışlayırlar. Şəxsən mən də beləyəm. Hazırda özümə daha çox güvənirəm, meydanda daha rahat oynayıram. Şükürov məndən öz oyunumu sakit şəkildə göstərməyi tələb edir.

– Azərbaycan Premyer Liqasında oynamaq çətindir? Çempionatımızın səviyyəsi sizi tam qane edirmi?

– Liqanın səviyyəsi yaxşıdır. Ancaq güclü komandaların sayını artırmaqla Azərbaycan çempionatını daha da inkişaf etdirmək olar. Ümumilikdə Premyer Liqanın səviyyəsi ürəyimcədir. Azərbaycan futbol oynamaq üçün çox yaxşı ölkədir.

– “Kəpəz” hazırda turnir cədvəlində 9-cu pillədədir. Necə düşünürsünüz, komandanız Premyer Liqadakı yerini qoruya biləcək?

– Hazırkı mövqeyimiz bizi qane edə bilməz. Amma irəliyə baxmalıyıq. Üzərimizə düşən vəzifə odur ki, hər oyunda qollar vuraq və qalib gələk. Bunu edə bilsək, turnir cədvəlində yuxarı pillələrə qalxacağıq.

– Azərbaycana gələn braziliyalı futbolçular adətən ölkəmizə və çempionatımıza tez bir zamanda uyğunlaşa, yaxşı oyun göstərə bilirlər. Bu nə ilə əlaqədardır?

– Dediyim kimi, Azərbaycan futbol oynamaq üçün çox yaxşı yerdir. Buna görə də ölkənizə gələn braziliyalı futbolçular burada özlərini çox rahat hiss edirlər, nəticədə əla futbol nümayiş etdirirlər. Səbəbi ancaq belə izah edərdim.

ABBAS