Digər idman növləri
“Azərbaycan qran-prisi daim maraqlı alınıb”
Azərbaycan qran-prisindən əvvəl pilotların media mənsubları qarşısında açıqlamaları dərc edilir. “Red Bull” pilotu Serxio Peres də yarışdan öncə öz fikirlərini bildirib.
Peres Bakıya istirahətdən sonra gəlib: “Ardıcıl üç yarışdan sonra dincəlmək və ailəmlə birlikdə vaxt keçirmək əla oldu. Bu müddət ərzində başverənləri təhlil edə bildik. Melburndakı yarış mənim üçün uğursuz alındı. İstər-istəməz belə şeylər yaddaşlara həkk edilir. Amma irəli baxmaq və işi davam etdirmək lazımdır. Avstraliyada şənbə çox bərbad gün oldu. Sərbəst yürüşlər və təsnifat faciəvi idi.
Güman edirəm ki, problemlərin nədən qaynaqlandığını öyrəndik. Problem kompleks halında olduğundan aradan qaldırılması da çətin idi. Bakıda onların baş verməyəcəyinə ümid edirəm.
Azərbaycan qran-prisi daim maraqlı alınıb. Burada sprintin keçirilməsinə ehtiyac yox idi. Rəhbərlik sprint üçün trasları düzgün seçməlidir. Sprintsiz də Bakı yarışı əyləncəli olur. Fikrimcə, belə şeylər nəzərə alınmalıdır.
Bakıya yeniliklərlə gəlmişik. Onların necə effektiv olacağı məlum deyil. Formatın yeni olması da işimizi çətinləşdirir. Hər bir dəqiqədən maksimum istifadə etməliyik. Çünki yeni formatda hər bir sessiyanın xüsusi önəmi var. Lakin ən vacibi bazar günü baş tutacaq yarışdır”.