Azarkeş problemi: onları tribunalara necə gətirmək olar?

Futbol üzrə Misli Premyer Liqasının yeni mövsümünə start verildi. Son illərdə ilk dəfə ötən mövsüm çempionatı tərk edən komanda olduğundan bir problemin həll edildiyini güman etmək olar. Ən azından komandalar yerlərini itirməkdən qorxacaq və bəzi oyunlara daha məsuliyyətli yanaşacaq. Qalır digər problemlər.

Əslində, həll ediləsi o qədər problem var ki, hansını söyləyəcəyimizi də bilmirik. Uzun illər yığışıb qalan çatışmazlıqlara görə bir şeyi söyləyə bilərik: biz, idman mediasından tutmuş futbolu sevən hər bir kəsə qədər hamımız bu illəri itirmişik. Və bu illər bizim həyatımızdan gedib, bu illər yuxarıda sadalanan insanların həyatından oğurlanıb.

Bu gün Azərbaycan futbolunu düşdüyü vəziyyətdən çıxarmağın yolları haqda danışarkən hərə bir fikir söyləyir. Amma əksər fikirlərin eyni olduğunu görərik. Uşaq futbolundan tutmuş çempionatımızın səviyyəsinə qədər hər bir sahədə həll ediləsi çatışmazlıq var.

Eyni şeyləri təkrar etmək fikrində deyilik. Başqa bir problemi qabardacağıq – bəlkə də futbolumuzun ən ciddi problemi olan azarkeşlərin stadionlara gəlməsini.

Azərbaycan çempionatının ən güclü vaxtlarında belə azarkeş sarıdan əziyyət çəkmişik. Bizim futbolda tribunalar yalnız yayda avrokubok oyunları zamanı dolur. Bu həftə oynanacaq “Neftçi” – “Beşiktaş” oyununda tribunalardakı atmosferi təsəvvür edin. Halbuki tribunada gözəl atmosferə bütün oyunlarda olmasa da,  çempionatımızın heç olmasa 20-30% oyunlarında ehtiyacımız var. Çünki tribunadakı atmosfer futbolun keyfiyyətinə, onun bazar qiymətinə təsir edən başlıca amillərdən biridir.

Bunu sübut etmək üçün pandemiya dövründəki oyunlara, dünyanın ən güclü komandalarının qarşılaşmalarına nəzər salmaq lazımdır. Boş tribunalar qarşısında kim oynayırsa oynasın, gözəgəlimli olmayacaq. Futbolçular da tamaşaçısız teatrda səhnəyə çıxan aktyorlara bənzəyəcəklər.

Buna görə də digər problemlərlə yanaşı futbolumuzu inkişaf etdirməyə çalışanlarımız bunun aradan qaldırılmasına diqqət yetirməlidirlər. Əlbəttə, bu problemin həlli yolları müxtəlifdir. Vaxtilə voleybolumuzda o həll yollarından birinin necə absurd olduğuna da şahidlik etmişik. “Azerreyl”in oyunlarında tribunalarda dəmiryol işçilərini yəqin ki, hamı xatırlayır. Onlardan da absurdu, “İqtisadçı” komandasının oyununda tribunaları müəllim heyəti ilə  doldurmaq olub. Təsəvvür edin ki, dinamik voleybol oyunu və tribunalarda qalstuklu qocaman professorlar. Nəzərə alsaq ki, bir müddət “İqtisadçı” komandasının heyəti tailandlı voleybolçulardan ibarət idi və buna görə də komandanın oyunları həmin ölkənin televiziyası ilə yayımlanırdı, o zaman Tailandda bizim necə intelligent voleybol azarkeşlərimiz olduğuna həsəd aparıldığını da güman edə bilərik.

Qayıdaq yenidən futbola və azarkeş probleminə. Əslində, bu yazının ərsəyə gəlməsinin səbəbkarı “Səbail” komandasıdır. Çempionatın açılış oyunu nəticə baxımından uğursuz alınsa da, klub rəhbərliyinin oyundan öncəki aksiyası alqışlanmalıdır. Komandaların Azərbaycanda Kino Gününə həsr edilən formalarla meydana çıxması təqdirəlayiq addımdır. Əminəm ki, rəhbərlik bunu etməklə tarixi olmayan klubun azarkeş sayını artırmağa çalışır. Bu, çox vacib addımdır. Bütün bunlar az da olsa, insanlarda stadiona gəlmək marağını artıracaq.

Xaricdə futbol həm də insanların əyləncə yeridir. Azarkeşlərin tribunalara cəlb edilməsi yolunda müxtəlif addımlar atılır. Liqa rəhbərlikləri də klubları bu yöndə işləmək üçün stimullaşdırır. Misal üçün, La liqada atılan addımlara nəzər yetirək. İki ildir ki, orada tribunaları boş olan klublara cərimə verilir. Bu mövsümdən isə azarkeşlərlə daha yaxşı işləyən və tribunaları dolduran komandalara TV hüquqdan əlavə maliyyə ayrılacaq. Bu da komandalar üçün əlavə stimuldur. Çalışıb biz də müxtəlif yollarla insanlara xoş anlar bəxş etməli və onları tribunalara cəlb etməliyik.

ABBAS

Yazı Azərbaycan Respublikasının Medianın İnkişafı Agentliyinin maliyyə dəstəyi ilə hazırlanıb.

Sahə: Uşaq və gənclərin fiziki və mənəvi inkişafında idmanın rolu