Bir Cem Fələk var idi

Birvaxtlar “Xəzər Lənkəran”ın sahibi, “Palmali” Şirkətlər Qrupunun prezidenti Mübariz Mənsimovun istedadına, gələcəyinə ümid bəsləyib böyük pullar xərclədiyi Cem Fələkdən uzun müddətdi səs-soraq yoxdu. Az qala futbolun ən ümidverici simalarından biri kimi reklam edilən vunderkind haqda mətbuatda kiçik qeydə də rast gəlmirik.

Onunla danışmaq, karyerası ilə maraqlanmaq üçün kiçik araşdırma apardıq. Oynadığı çempionatlardakı komandalarla əlaqə saxlamağa, onu tapmağa çalışdıq. Di gəl ki, Cemi “gördüm” deyən olmadı.

Fələk sonuncu dəfə Kipr çempionatında oynayan “Aris”də icarə əsasında çıxış edib. Müqavilə ilə Finlandiyanın “Kups” klubuna məxsus olsa da, daha çox icarələrdə gün keçirib. Ehtiyatda oturmaqla məşğul olan Fələkin “fələk”dən istədikləri yerinə yetməyib.

“Darmştadt”, “Dersim”, “Ginsheym” – bunlar Cemin 6 aydan uzun müddətə qala bilmədiyi komandaların siyahısıdı. 6-cı bundesliqada belə möhkəmlənə bilməyən, hazırda 26 yaşın içində olan Fələyə xərclənən pullarla Lənkəranda bəlkə də böyük bir akademiya tikmək olardı və oradan bir yox, daha çox Toral Bayramlı çıxardı.