Bir cütdə çox şey aydınlaşdı

Bu gecə MBA-da seriyanın 3-cü oyunlarına start verilib. Keçirilən 3 qarşılaşmadan sonra cütlüyün birində demək olar ki, hər şeyin müəyyənləşdiyini söyləmək olar.

Filadelfiya basketbolçuları evdəki iki qələbədən sonra səfərdə də qalib gələrək ümumi hesabı 3:0-a çatdırıblar. İlk iki qarşılaşma ilə müqayisədə bu dəfə oyun həddindən artıq gərgin alınıb. Hətta oyun ərzində meydançadan qovulan basketbolçular da olub.

İlk hissə qonaqların təşəbbüsü ilə keçib. Hər iki periodda onların cüzi üstünlüyü qeydə alınıb. Lakin böyük fasilədən sonra “Bruklin”in məhsuldarlığı oyunda intriqanı bərpa edib. Hesabda önə keçmələrinə baxmayaraq, “Nets” sona qədər üstünlüyü qoruya bilməyərək məğlubiyyətlə barışıb – 97:102.

Bu dəfə də Coel Embiidin məhsuldarlığı yüksək səviyyədə olmayıb. Çempionatın ən güclülərindən biri olan Embiid play-offda hələlik elə də nəzərə çarpmır.

Şimali Kaliforniya derbisinin 3-cü qarşılaşmasında son çempion qalib gəlib – 114:97. Bu qələbəylə onlar ümumi hesabda fərqi minimuma endiriblər.

“Qolden Steyt Vorriors”un bu qələbəsində ən böyük pay 36 xal toplayan Stiv Körriyə düşür. Qonaqların heyətində isə ciddi şəkildə fərqlənə biləcək basketbolçu olmayıb.

Gecənin ən maraqlı qarşılaşmalarından biri Los-Ancelesdə keçirilib. Səfərdə “Finiks Sans”la oynadığı 2 görüşün birində qalib gələn “Klippers” seriyada az da olsa, üstünlük əldə etmişdi. Lakin evdə keçirdiyi ilk oyunda onlar bu üstünlüyünü itirib. Gərginliyi ilə yadda qalan görüşün taleyi 3-cü periodda həll edilib – 124:129.

Bu cütlüyü Dürant – Vestbruk qarşıdurması adlandırsalar da, səhnəyə tamamilə başqa basketbolçular çıxıb. Meydan sahiblərinin heyətində Pauell 42 xal toplayıb. Qonaqlarda isə Buker liderlik funksiyasını Düranta vermək fikrində olmadığını bir da sübuta yetirərək 45 xal toplayıb. Beləliklə, Los-Ancelesdəki ilk oyundan sonra seriyada hesab Finiks təmsilçisinin xeyrinə dəyişib.