Denver təmsilçisi fərqi artırdı

MBA-da bu gecə təqvimə əsasən seriyanın 2-ci oyunları keçirilib. 3 oyundan ikisində qarşılaşmanın taleyi erkən həll edilib.

Futbolinfo.az xəbər verir ki, ən çox gərginlik Denverdə baş verib. Çempionatın qalibi “Naggets” “Minnesota” ilə oyunda xeyli əziyyət çəkib. Serb basketbolçu Yokiç tripl-dabl etməyə yaxın olub (27 xal+9 ribaund+9 assist). Gözlənilənlərin əksinə olaraq onu birdən-birə iki basketbolçu kölgədə qoymağı bacarıb. Denverlilərin heyətində Mürrey 42 xal toplayıb. Qonaqlardan isə Edvards oyunu 41 xalla tamamlayıb. Cəzadan dönən fransız basketbolçu Qoberin aktivində 19 xal var.

Bu qələbə ilə Denver komandası seriyada hesabı artırıb – 2:0. Qarşıdakı iki oyun “Minnesota Timbervuls”un meydançasında keçiriləcək.

Müntəzəm çempionatın qalibi ilə birlikdə çempionluğa əsas namizəd sayılan “Miluoki” isə seriyada hesabı bərabərləşdirə bilib. Qələbənin qiyməti onu lidersiz əldə etməklə bir qədər də artıb. Ümumiyyətlə, “Baks” MBA tarixində lideri oynamadan ən çox xal qazanan komanda ünvanına sahib çıxıb – 138:122.

İlk görüşdə zədələnən Yannisin yoxluğunu meydan sahibləri komanda oyunu ilə sığortalaya biliblər. Heyətdəki 7 oyunçu ikirəqəmli xal toplaya bilib. Ən çox seçilən isə 25 xal yığan Bruk Lopes və dabl-dabl edən Portislə Holidey olub.

Əslində, eyni sözləri “Mayami Hits” haqqında da söyləmək olar. Qonaqların heyətində də 6 basketbolçu ikirəqəmli xal toplamağı bacarıb. Lakin meydan sahiblərinin 2-ci perioddakı məhsuldarlığı görüşün intriqasını vaxtından əvvəl öldürüb.

Oyunda daha bir rekord üçxallıq atışlarla bağlıdır. MBA tarixində ilk dəfə olaraq bir komanda görüşdə 25 dəfə dəqiq üçxallıq atış yerinə yetirib. Seriyanın növbəti iki oyunu Mayamidə keçiriləcək.

Hesabın bərabərləşdiyi digər seriya “Memfis Qrizliz” – “Los-Anceles Leykers” qarşılaşmasıdır. İkinci oyunda meydan sahibləri qalib gəlib – 103:93.

Lebron Ceymsin dabl-dablı da qonaqlara yardım etməyib. Buna baxmayaraq, Los-Anceles təmsilçisi cütün favoriti statusuna malikdir. Belə ki, “Memfis”in ulduzu Co Morantın zədəsinin ciddi olduğu aşkarlanıb. Onun yoxluğunda isə “Qrizliz”in bütün seriya ərzində “Leykers”lə başabaş mübarizə aparacağı inandırıcı görünmür. Qarşıdakı oyunlar üçün komandalar Los-Ancelesə yollanacaq.

MBA ilə bağlı digər xəbər ilin məşqçisinin kimliyi ilə bağlıdır. “Sakramento Kinqs”in baş məşqçisi Mayk Braun ilin ən yaxşısı seçilib. MBA tarixində ilk dəfə olaraq səsverənlərin hamısı onu 1-ci yerdə yazıblar. Bu, Braunun karyerasında ikinci mükafatdır. 2009-cu ildə o, “Klivlend”də işləyərkən də ilin ən yaxşı baş məşqçisi seçilmişdi.