“Denver” üstünlüyünü artırdı

MBA-da bu gecə daha 3 oyun keçirilib. Dünən olduğu kimi, bu gün də bir komandanın seriyada dominantlığı müşahidə edilib.

Çempionatı ilk pillədə başa vuran “Denver Naggets” səfərdə də Minnesota basketbolçularına aman verməyib – 111:120. Bu qələbə sayəsində seriyada hesab 3:0-a yüksəlib. MBA tarixinin statistikasına inanası olsaq, belə bir fərqi aradan qaldırmağın mümkünsüz olduğunu görərik.

Seriyada ilk dəfə olaraq “Timbervuls” rəqibə müqavimət göstərib. Bu baxımdan Edvardsın 36 xalını da qeyd etmək lazımdır. Lakin sonluğu məhz qonaqlar daha yaxşı keçiriblər. “Denver”in heyətində Luka Yokiç xüsusilə fərqlənib. Ulduz basketbolçu bu mövsüm play-offlarda ilk tripl-dabl edən oyunçu ünvanına sahib çıxıb (20 xal + 11 ribaund + 12 assist). Ümumilikdə isə bu onun karyerasında play-offlarda 7-ci tripl-dablıdır. Seriyanın növbəti oyunu da Minnesotada keçiriləcək.

Digər iki oyun ssenarisinə görə bir-birinə bənzəyib. Hər iki oyunda müqəddərat 2-ci periodda həll edilib. Çempionluğun əsas favoritlərdən sayılan “Boston” komandası ilk səfər görüşünü məğlubiyyətlə başa vurub. Play-indən gələn “Atlanta Houks” inamlı qələbə qazanıb – 130:122.

Oyunda Yanqı xüsusi qeyd etmək lazımdır. O, görüşü 32 xalla tamamlayıb. Bostonun üzvü Ceyson Teytum isə 29 xalla yanaşı, 10 dəfə də ribaund edib. Atlanta komandasının ehtiyat oyunçuları bu dəfə də özlərini yaxşı tərəfdən göstəriblər. Seriyanın ilk oyununda olduğu kimi, Boqdanoviç məhsuldarlığı ilə seçilib (15 xal). Seriyada hesab 2:1 “Boston Seltiks”in xeyrinədir. Növbəti oyun yenə də Atlantada keçiriləcək.

Daha bir darmadağın Nyu-Yorkda qeydə alınıb. “Niks”  ilk ev oyununda Klivlendə qalib gəlib. 2-ci periodda hər şey həll edildikdən sonra oyun sakit məcraya keçib. Belə olan halda baş məşqçilər qarşılaşmanın sonlarında ehtiyat oyunçulara şans veriblər. Təəssüf ki, onlar arasında yer alan türkiyəli basketbolçu Cedi Osman heç nə ilə yadda qalmayıb. Bu qələbədən sonra seriyada hesab 2:1 Nyu-York təmsilçisinin xeyrinədir. Növbəti oyun da “Medison Skver Qarden”də olacaq.

Play-off oyunlarının gərginliyi basketbolçuların zədələrini artırıb. “Filadelfiya”nın lideri Coel Embid zədə səbəbilə seriyadakı 4-cü oyunu buraxacaq. O, dizindən xəsarət alıb. Digər zədələnən ulduz basketbolçu isə Kavay Leonarddır. Bağlarının dartılmasına görə Leonard “Finiks”lə bu gün keçiriləcək 4-cü oyunda meydançaya çıxa bilməyəcək. Co Morantın da zədəsi davam edir. Ulduz basketbolçunun “Leykers”lə qarşıdakı oyunda iştirakı sual altındadır.