Elçin Usubun təşvişi: “Şamaxı” Premyer Liqada qalmaq üçün güzəşt umur

“Şamaxı” narahatdır. Komandanın Premyer Liqanı tərk etməyə real namizəd olması klub rəhbərliyini şou göstərməyə vadar edib.

Əslində, “Şamaxı”nın bu aqibətlə üzləşəcəyi bəlli idi. Çempionata legionersiz başlayan komandanın seçdiyi strategiya hər nə qədər xoşagəlimli olsa da, riskliydi. Belə ki, bu heyətin sonadək davam gətirməyəcəyini, Diviziona yuvarlanacağını proqnozlaşdırmaq üçün mütəxəssis olmağa gərək yoxdur.

Mövsüm boyunca eyni büdcəli komandalar heyətini legionerlərlə zənginləşdirdiyi halda, “Şamaxı”nın büdcəyə qənaət etməsi qəribə görünürdü. Amma çoxarına bəllidir ki, vəsaitin bir qismi sabiq prezident Zaur Axundovun vaxtından qalan borclara xərclənir, hansısa qənaətdən söhbət gedə bilməz. Seçilən strategiya isə Azərbaycan futbolunun inkişafını düşünməyə görə deyil, həmin “əməliyyatlar”a don geyindirmək üçündür.

Artıq finişə yaxınlaşırıq və “Şamaxı” rəhbərliyi Premyer Liqada qalmaq üçün guya əla işlər gördüyünü reklam etmək üçün bəyanat yayır, güzəşt umur. AFFA rəhbərliyinin son pilləni tutan komandanın elitanı tərk edəcəyi ilə bağlı qərarda qəti olması klubun İdarə Heyətinin sədri Elçin Usubu narahat etməyə başlayıb. İdman mübarizəsində məğlub olmaqda olan “Şamaxı” ortalığı qarışdırıb təzyiq göstərməyə cəhd edir.

“Şamaxı” bəyanatda seçdiyi strategiyanın üstünlüklərindən bəhs edir, görülən işləri gözə soxmağa çalışır. Haqlı olduqları məqamlar var, amma bəzi cümlələrə yalanları da pərçim ediblər. Məsələn, mövsümə başlayarkən heyət üzvlərinin 15 nəfərinin 23 yaşına çatmamış gənclər olduğu vurğulanır. Doğrudur, lakin qeyd edilmir ki, həmin futbolçular başqalarının oyunçularıdır, bölgə klubunda icarə əsasında oynayırlar. Mövsüm bitən kimi də məxsus olduqları klublara gedəcəklər.

Bəyanatda komandanın ilkin formalaşması dövrünün arxada qoyulduğu qeyd olunub. Bu da yalandır. İcarədə olanlar gedəndən, heyətdəki veteranlar karyerasını bitirdikdən sonra “Şamaxı” yenidən hər şeyə sıfırdan başlamalı olacaq.

Klub artıq bir neçə futbolçularının adından söz etdirməyə başladığını və ölkənin köklü klublarının maraq dairəsinə düşdüyünü qeyd edib. Bu da yalandır. Çünki diqqət çəkən oyunçuların böyük əksəriyyəti “Qarabağ”ın, “Sabah”ın, “Zirə”nin futbolçularıdır və onların taleyinə məxsus olduqları klublar qərar verəcək. Elə milli komandalara çağırılanlar da icarədə olanlardır və əksəriyyət əvvəllər də yığmalara çağırılırdı.

Bəyanatın sonluğu niyyəti çılpaqlığı ilə üzə çıxarır: “Şamaxı” artıq yeni bir inkişaf mərhələsinə doğru irəliləmək üçün mühüm addımlar atmaqdadır. Klub rəhbərliyi, məşqçilər və inzibati heyət qarşıya qoyulmuş məqsədlərə çatmaq üçün tərtib edilmiş plan üzrə yorulmadan birlikdə fəaliyyət göstərir. Biz yaxın gələcəkdə komandamızın məqsədlərinə çatacağına və ölkə futbolu adına uğur qazanacağına çox inanırıq.

Yerli oyunçuların ölkə futboluna qazandırılması işində komandamıza verdikləri dəstəyə görə azarkeşlərimizə, idman jurnalistlərinə və futbol ictimaiyyətinə dərin minnətdarlığımızı bildiririk və bundan sonra da onların böyük dəstəyinə ehtiyacımızın olduğunu bəyan edirik”.

Yox, cənab Elçin Usub, öncəlik idman prinsipləri olmalıdır. Qarşıda 7 tur var, zəhmət çəkib Premyer Liqadakı yerinizi təmin edin. Hansı işlərin görüldüyünü mövsümün sonunda birlikdə analiz edərik. Diviziona düşmək faciə deyil, strategiyanız həqiqətən mükəmməldirsə, orada yola davam edib yenidən elitaya qayıda bilərsiz. Xahişlə, təzyiqlə, yalançı reklamla güzəşt ummayın. Ölkə futboluna nəhayət, bir nizam gəlməlidir.

FƏRİD