Ölkə futbolu
Gərgin “Turan Tovuz”: özünə gəlmək üçün bir qələbə lazımdır
“Turan Tovuz” mövsümün yarıdan çoxunu 6-cı pillədə keçirsə də, hələ Premyer Liqada yerini rəsmən təmin etməyib. Qərblilər sonuncu pillədən 8 xal öndədir və qalan 6 turda bu fərqin əriməsi mümkündür.
Düzdür, tovuzlular 4 komandanı qabaqlayır və qazanılacaq 1-2 xal belə vəzifəni yerinə yetirməyə kifayət edəcək. Hətta rəqiblərin büdrəmə ehtimalının böyük olduğunu nəzərə alsaq, bütün oyunları uduzmaqla da elitada qalmaq mümkündür. İstənilən halda, ciddi təhlükə yoxdur, tovuzlular növbəti mövsümün planlarını cıza bilər.
Bununla belə, komandada gərginlik hiss olunur. Ən yaxındakı rəqib olan “Kəpəz”ə məğlubiyyətdən sonra “Turan Tovuz”un düşərgəsində narahatlıq var. Ötən tur azarkeşlərin istefa şüarlarından sonra təzyiq daha da çoxalıb. Qələbəsiz oyunlar seriyasının 7-yə çatması azarkeşləri narazı salır, futbolçular isə psixoloji gərginlikdən çıxa bilmir.
Əslində, komanda heç də mövsümün ilk yarısındakı nəticələrin kölgəsində yatmır. 2023-də baş tutan 12 oyunda 15 xal toplayan komanda ilk iki dövrədəki nəticələri indidən – bitimə 6 tur qalarkən yaxşılaşdırıb. Lakin komanda mövsümün ikinci yarısında evdə cəmi bir qələbə qazanıb, ümumiyyətlə, 15 xaldan yalnız 4-nü Tovuzda əldə edib. Azarkeşlərin narazılığı həm də bununla bağlıdır.
Eltada qalmaq uğrunda mübarizənin qızışdığı bir vaxtda əsəblər tarıma çəkilib. Lakin elə həlledici oyunlar bəzi futbolçuların istənilən səviyyədə olmadığını göstərir. Mövsümün əvvəlində komanda təzə yığılırdı və büdcəyə uyğun gələnlər heyətə cəlb edildi. İndi isə daha ağıllı qərarlar vermək, yeni mövsüm üçün daha mübariz komanda formalaşdırmaq lazımdır. Bu səbəbdən “Turan Tovuz”un bəzi futbolçularla müqaviləni yeniləməsi tələsik addım sayılmalıdır. Məsələn, Şəhriyar Əliyev komandada qalacağını bildikdən bəri səhvlərlə yadda qalır, digərlərində də arxayınlıq yaranıb.
Zaman göstərir ki, gələn mövsümün komandasında indiki heyətdən yalnız bir neçə nəfər qalmağa layiqdir. Təbii ki, söhbət daha güclü “Turan Tovuz”un qurulmasından gedirsə, addımlar soyuqqanlı atılmalıdır. Komandanın sabit oynaması üçün yüksək səviyyəli bir neçə futbolçuya ehtiyac var. Əks halda, həlledici matçlarda lider çatışmazlığı yenə nəticələrdə özünü göstərəcək.
Qərb klubu son zamanlar çox tənqid olunsa da, vəziyyət faciəvi deyil, əksinə, daha üst pillədə olmağın rahatçılığı arxayınçılıq yaradıb. Başqa sözlə, motivasiyasızlıq var və bu, qələbələrə mane olur. Yəqin ki, 6-cı pillənin itirilməsi təhlükəsi ciddiləşəndən sonra futbolçular da silkələnmək zərurətini hiss edəcək.
Amma onadək “Turan Tovuz”u kubok mübarizəsi gözləyir. Komanda “Neftçi”dən zəif görünsə də, şansı pis deyil, toparlanmaq mümkün olsa, elə yüksək motivasiya hesabına sürprizə imza atmaq mümkündür. Heç vaxt kubokda finalçı olmayan komanda bunu bacarsa, klub tarixində yeni səhifə açacaq.
Uzun fasilədən sonra Premyer Liqaya qayıtmış komanda üçün bugünəqədərki nəticələr də pis deyil. Zatən məqsəd Premyer Liqada qalmaq idi, kubokda yarımfinala vəsiqə isə bonus sayılmalıdır. Növbəti mövsümlər üçün daha iddialı komanda qurmaq istəyən rəhbərlik, hazırda ilk mərhələni uğurla yekunlaşdırmağa çalışır. Hazırkı uğursuzluqlar gələcəkdə komandaya xeyir verəcək, dərs çıxarmaq üçün “əyani vəsait”dir. Azarkeşlərlə kiçik konfliktləri yoluna qoymaq, birlik yaratmaq lazımdır. Elə növbəti kubok matçında “Neftçi” üzərində qələbə bütün narazılıqları unutmaq üçün kifayət edə bilər.
AĞA
- Ölkə futbolu2024-05-13 08:32
“Qarabağ” – postsovet məkanının ən yaxşı komandası
- Ölkə futbolu2024-05-13 10:15
İK gündəmi: Premyer Liqada say dəyişməyəcək?!
- Ölkə futbolu2024-05-13 19:32
Rövşən Nəcəf: “Premyer Liqada iştirak edəcək klubların sayında artım olmayacaq”
- Milli komanda2024-05-12 15:31
Millimiz iki yoldaşlıq görüşü keçirəcək