Ölkə futbolu
Heç-heçələr günü
“Kəpəz” minimum tapşırığı yerinə yetirməklə Premyer Liqada qalmaq yolunda önəmli addım atdı. Şamaxıda qazanılan xal gəncəlilər üçün təkcə “Turan Tovuz”la xallarının sayını bərabərləşdirməsi baxımından mühüm deyildi. Bu, həm də əsas rəqiblərdən biri ilə ilə aradakı məsafəni qorumaq üçün önəmli idi.
“Kəpəz”in ən böyük üstünlüyü uduzmamasıdır. Komanda qələbə qazanmayanda belə məğlub olmamaqla önəmli xallar əldə edir və bu, çox önəmli məqamdır. “Şamaxı” isə 7 turdur qələbə qazanmır, komanda taleyi ilə barışmaqdadır. Əsas rəqiblərlə ikisi evdə olmaqla, son 3 matçdakı heç-heçələr bölgə təmsilçisinin şansları əldən qaçırması deməkdir. Bu qarşılaşmaların birində qələbə qazanılsaydı, indi vəziyyət tam başqa olardı. İndiki gedişat “Səbail”lə son turdakı matçın finala çevriləcəyini göstərir.
Turun açılış günündəki ikinci matçda da xal bölgüsü qeydə alındı. Ramazan bayramı günündə futbolçular sanki qol orucunu da açdı və 4 futbolçu 10 dəqiqə içində fərqləndi. Suraxanıda yağışlı havada izlədiyimiz “qol yağışı” qalibi müəyyənləşdirməyə imkan verməsə də, “Qarabağ”ın ardıcıl ikinci oyunda xal itirməsi ilə nəticələndi. Hətta ağdamlılar son dəqiqələrdə bir xaldan da ola bilərdi. Vladislav Kulaç dəqiq oynasaydı, Qurban Qurbanovun yetirmələri 4 gün ərzində tarixi ərzində yenilmədiyi iki komandanın ikisi ilə də statistikasını pozacaqdı. “Sabah” ilk qələbəsini qazanmağı bacardı, “Zirə” isə yenə xal itkisi ilə barışdı.
“Zirə” 4-cü pillə uğrunda sonadək mübarizə aparacağını göstərdisə, “Qarabağ” “Sabah”a fərqi azaltmaq imkanı verdi. Bakılılar bu tur “Turan Tovuz”la matçda qələbə qazanmaqla ümidini bir qədər artıra blər. Çox güman ki, qərblilər kubok matçını düşünərək qarşılaşmaya əsas heyəti buraxmayacaq və “Sabah”ın işi asanlaşacaq. Düzdür, 5 tura hətta 7 xal fərqini əritmək də asan olmayacaq. “Qarabağ” çətin ki, ardıcıl 3-cü oyunda büdrəsin, komanda tezliklə toparlanıb növbəti çempionluğu rəsmiləşdirəcək.
Son oyunlar da göstərdi ki, “Qarabağ”ın güclənməsinə ehtiyac var. Dünən “Zirə” bir qədər təzyiqi artıran kimi iki topluq geriliyi aradan qaldırdı, hətta qələbə də qazana bilərdi. Qışda itirilən oyunçuların yeri doldurulmayıb, yeni transferlər heyətə uyğunlaşmır. Hətta Qurban Qurbanov dünən əvəzetməyə ehtiyac görmədi. Oyunda fərq yarada biləcək ehtiyat qüvvənin olmadığı aşkar görünür. Bu heyət isə rəqiblər üçün “oxunmuş kitab”dır.
“Qarabağ” istənilən halda çempion olacaq. Lakin komanda yayda əhəmiyyətli şəkildə güclənməsə, növbəti mövsümdə hətta Premyer Liqada rəqibləri üzərində ciddi üstünlük qura bilməyəcək.
FƏRİD
- Ölkə futbolu2024-05-12 10:36
Mahir Xorvatiya çempionu oldu
- Ölkə futbolu2024-05-13 10:15
İK gündəmi: Premyer Liqada say dəyişməyəcək?!
- Ölkə futbolu2024-05-13 08:32
“Qarabağ” – postsovet məkanının ən yaxşı komandası
- Ölkə futbolu2024-05-12 08:45
Elxan Məmmədov – Mərdəkandan Kürdəxanıya yollanmaq üçün səbəb var