“Kəpəz”lə müqavilə bağlayıb “Şamaxı”ya qaçdı

Yeni mövsümə hazırlaşan “Kəpəz”də vəziyyət yaxşı deyil. Düzdü, komanda transferlər edir, məşqlərini davam etdirir və yoxlama matçları reallaşdırır. Lakin klubdaxili ab-hava istənilən səviyyədə görünmür.

Komandanın yeni transferi Əfran İsmayılovun dediklərindən də bunu anlamaq olar. “Futbol+”in yazdığına görə, təcrübəli yarımmüdafiəçi Gəncə təmsilçisinə qoşulmasına peşman olub. Birillik müqavilə bağlayacaq Əfran “Kəpəz”dəki şəraitdən və məşqlərdən narazıdı. O, yaxın ətrafına “Rauf Əliyev başımı aldatdı. Gül kimi məşqçi olacaqdım. Onun xətrinə Gəncə klubuna gəldim. Burda vəziyyət yaxşı deyil. Məşqlər də sovet dövründən qalma sistemlə keçirilir”, deyib.

“Kəpəz”lə bağlı digər xoşagəlməz xəbər isə konkret fakta söykənir. Belə ki, 3 həftə öncə komanda ilə yeni müqavilə bağlayan futbolçulardan biri düşərgədən qaçıb. Lakin gəncəlilər gələn futbolçularla bağlı xəbərləri paylaşsalar da, gedənlərlə bağlı bilgi vermirlər.

Belə ki, mövsümə hazırlıqlar start götürəndə Qərb təmsilçisi 4 futbolçu ilə müqavilənin yeniləndiyini rəsmən açıqlamışdı. Ötən mövsüm komandanın şərəfini qoruyan müdafiəçi Elçin Əlicanov, yarımmüdafiəçilər Tural Rzayev, Nicat Süleymanov və hücumçu Bəhruz Teymurov Premyer Liqada da Nizami yurdunun təmsilçisinin heyətində çıxış edəcəkdi. Onlarla birillik müqavilə imzalandığı rəsmən bəyan edilmişdi.

İndi isə bəlli olur ki, həmin “müqavilə bağlamış” futbolçulardan biri – Bəhruz Teymurov düşərgədə yoxdu. Hücumçu “Kəpəz”dəki durumdan narazı olduğu üçün “Şamaxı”nın düşərgəsinə qaçıb, oradakı hazırlıqlara qoşulub. Gəncəlilər isə futbolçu ilə müqaviləni rəsmiləşdirməmiş açıqladığı üçün şamaxılılara etiraz, futbolçudan AFFA-ya şikayət edə bilmir.

Qərb təmsilçisində əksər işlər həvəskar səviyyədə qurulduğundan mövsümün startına kimi belə xəbərlərlə tez-tez qarşılaşa bilərik.