Digər idman növləri
“Leykers” önə çıxdı
Bu gecə MBA-da 2-ci raundun 2 oyunu baş tutub. “Nyu-York Niks”lə “Mayami Hits” komandaları arasında seriyanın 2-ci görüşündə meydan sahibləri qalib gəliblər – 111:105.
“Medison Skver Qarden”də keçirilən ilk oyunda qonaqlar qələbə qazanmışdılar. Bu dəfə də onlar qələbəyə daha yaxın olublar. Lakin 4-cü periodda meydan sahiblərinin əzmkarlığı buna imkan verməyib.
Məğlubiyyətin səbəblərindən biri kimi “Mayami”nin ulduzu Cimmi Batlerin oyunu buraxmasını qeyd etmək mümkündür. Keçən qarşılaşmanın sonunda zədələnən basketbolçu meydançanı tərk etməsə də , bu dəfə oynaya bilməyib. Ondan başqa “Mayami”də Oladipo da zədəlidir. Nyu-York komandasının heyətində Rendl (25+12+8) və Hartı (14+11+9) qeyd etmək lazımdır. Hər iki basketbolçu tripl-dabl etməyə yaxın olub.
Bu qələbədən sonra seriyada hesab bərabərləşib. Növbəti 2 oyun Mayamidə keçiriləcək.
Maraqla gözlənilən “Los-Anceles Leykers” – “Qolden Steyt Vorriors” seriyasının ilk oyunu azarkeşlərə zövq verib. Qonaqların hesabda böyük fərq yaratmasına baxmayaraq, “Vorriors”un son periodda 14:0-lıq sıçrayışı vəziyyəti yenidən gərginləşdirib. Lakin sonda yenə də “Leykers” dəqiq olub. Nəticədə Lebronun komandası ilk oyunu qələbəylə başa vurub (117:112).
Ceymsin dabl-dablına baxmayaraq Devisi daha çox qeyd etmək lazımdır. Qonaqların mərkəz basketbolçusu 30 xaldan başqa 23 dəfə də ribaund edib. Maraqlıdır ki, meydan sahiblərinin eyni ampluada çıxış edən basketbolçusunun da aktivində 23 xal var. Kevon Luni karyerası ərzində bir oyunda ən yüksək göstəricisinə imza atıb. Məlum olduğu kimi, MBA-da ribaundların kralı Dennis Rodman olub. “Qolden Steyt”in azarkeşlərindən biri məhz üzərində Luninin adı yazılan Rodmanın forması ilə arenaya gəlib.
Bu qələbəylə Los-Anceles təmsilçisi seriyada 1:0 öndədir.
Oyunlardan əlavə ötən gecə MBA-da vacib hadisələrdən biri son çempionatın ən dəyərli basketbolçusunun müəyyənləşməsidir. Gözlənildiyi kimi, mövsümün MVP-si Coel Embid seçilib. “Filadelfiya Siksers” komandasının ulduzu bu nominasiyada Nikola Yokiç , Yannis Antetokumbo və digərlərini qabaqlayıb.
Əlavə edək ki, Embid son iki ildə MBA-da ən çox xal toplayan basketbolçudur. Bu ili o, 33,1 xallıq orta göstəriciylə başa vurub. Filadelfiya komandasının tarixində Embid MVP seçilən 5-ci basketbolçudur. Ona qədər Çemberlen, İrvinq, Mozes Meloun və Ayverson mövsümün ən yaxşısı seçilmişdi.
Xatırladaq ki, hazırda zədəli olan Embid “Boston”la ilk qarşılaşmada meydana çıxmayıb. Onun 2-ci oyunda heyətdə olması gözlənilir. “Finiks Sans” komandasının zədəli pleymeykeri Kris Polun zədəsi isə daha ciddidir. Veteran basketbolçu 3, 4 və 5-ci oyunlarda komandasına kömək edə bilməyəcək.