Ölkə futbolu
Lider uzaqlaşdı, autsayder dəyişdi
Bəlkə də daha bir səhvin düzəlişi mümkün olmayacaq, amma hələ də hər şey “Neftçi”nin öz əlindədi. Lider “Qarabağ”la üç xallıq fərq, bu rəqiblərin öz aralarında şəxsi oyun var. Son tura kimi vəziyyət dəyişməsə, bakılılar qələbə qazanıb, qızıl medala qovuşa bilər.
Bu, işin nəzəri tərəfidi. Eyni zamanda o da var ki, “Neftçi”nin xal itkisinə yol verməsi özləri üçün faciəylə nəticələnərsə, “Qarabağ”ın qarşıdakı üç turda iki dəfə uduzmaq lüksü qalır. Ağdamlılar da son turda əsas rəqibini yenməklə çempion ola bilər.
Yəni, çempionluq mübarizəsi bitməyib, sadəcə, durumlar fərqlidi. Dünən böhranlı günləri bitirən “Qarabağ” psixoloji üstünlük qazanıb, “Neftçi”nin isə ardıcıl dörd səfər oyununda maksimuma nail olması çətin görünür. Sabit oynaya bilməyən Samir Abasovun yetirmələri dünənədək xal vermədikləri “Sabah”dan zərbə alınca vəziyyət pisləşib.
Bakılılar çox asan qollar buraxdığı görüşdə məğlubiyyətdən qaçmağı bacardı. Amma 8 nəfərlə qalan rəqibə qalib gəlmək lazım idi. Hakim amili oyuna damğa vursa da, bu, bəhanə olmamalıdı, çünki qərarlar “Neftçi”yə qarşı deyildi. Müdafiədəki səhvlərə diqqət yetirmək, rəqibə rahat epizodlar verməyin səbəblərini tapmaq lazımdı.
Bir də Keyske Hondanın komandanın çıxışına təsir etdiyi vurğulanmalıdı. Yapon yaxşı futbolçudu, lakin yaş işini görür, məhz onun gəlişindən sonra Sabir Buqrinin fəaliyyət sahəsi, eyni zamanda effektivliyi azalıb. Hondanın penaltiyə səbəbkar olub, komandanı çətin vəziyyətə salması hamının başına gəlməsi mümkün olan adi epizod idi. Lakin o, hücum kombinasiyalarındakı tempi aşağı salır, yarımmüdafiədən sürətli çıxışları ləngidir. Tallisonun cinahdakı səhvlərini, Mbodjun astagəlliyini bunun üzərinə gələndə xal itkisi qaçılmaz olur.
Dünən “Qarabağ” da ideal oyun sərgiləmədi. İlk qol vurulana kimi “Qarabağ” psixoloji gərginlikdəydi, rəqibdən aşkar üstün oynamırdı. Amma heyət problemi yaşayan ağdamlıların qolçuları sıraya qayıdınca, vəziyyət dəyişdi. Xayme Romero oyuna girincə hücumda rəngarənglik yaratdı və hesabı açdı. Düzdü, həmin epizodda qapıçının səhvi var idi, lakin iş ondadı ki, 64-cü dəqiqəyə kimi qonaqlar qapıya düz-əməlli zərbə də endirə bilmirdi, ispan bu çatışmazlığı aradan qaldırdı, nəticə özünü gözlətmədi. Məhz bundan sonra çiynindəki psixoloji yükü atan “Qarabağ” qolları sıraladı.
26 dəqiqəyə beş cavabsız qol vuran ağdamlıların darmadağınını Mahir Emreli rəsmiləşdirdi. 19 dəqiqə meydanda olan forvard zədədən dönüşünü het-triklə bəzədi. Bunu üç dəqiqəyə rəsmiləşdirən hücumçu son saniyələrdə qazandığı penaltini qola çevirsəydi, daha gözəgəlimli rekorda imza atacaqdı. Amma azı iki qolda aşkar səhv edən Anar Nəzirov zərbəni dəf edib, günahlarını qismən yudu.
Premyer Liqanın 24-cü turunun digər iki oyunu da mövqe mübarizəsi baxımından önəmliydi. Bürünc medal üçün yarışan “Zirə”ylə “Sumqayıt” şəxsi duellərində elə taktika seçmişdi ki, bir sutka da oynasaydılar, hesab açılmayacaqdı. Yaxşı qapanan “kimyaçılar” rəqibinə epizod verməyib, 3-cü pillədəki mövqeyini qorudu. 4 dövrənin yekununda şəxsi oyunlardakı üstünlük Ayxan Abbasovun yetirmələri üçün əlavə bonus oldu – xallar bərabər olarsa, “qartallar” onlara aşağıdan yuxarı baxacaq.
Hər iki komandanın kubokda mübarizəni davam etdirməsi də qeyd olunmalıdı. Sıx qrafik üzündən güc itirən rəqiblər yarımfinalın cavab görüşlərini düşünərək oynamağa məcbur idi. Və bu həftə “Zirə” finala vəsiqə qazansa, avrokubok iştirakçılarının tam siyahısı bəlli olacaq. Xeyli uzaqda qalan “Qəbələ”üçün ilk “dördlük” əlçatmazdı, “Keşlə” də son ümidini itirsə, yalnız medalçıların sıralamasını gözləyəcəyik.
Ardıcıl 14 qələbəsiz oyundan sonra tilsimi qıran “Keşlə” birdən-birə iki pillə irəlilədi. Əvəzində sıralanan üç heç-heçədən sonra yenilən “Səbail” sonuncu sıraya yuvarlandı. “Sabah”ın xal qazanması onların vəziyyətini daha da pisləşdirdi. Mövsümün sonunadək zirzəmidən qaçmaq üçün mübarizə aparacaq “üçlüy”ün şəxsi oyunları qalmayıb. Ona görə də onların taleyi digər komandalarla matçlarda həll olunacaq.
CAVAD