Liderlər ayılanda – iki oyuna 9:0

4 komanda üçün il bitdi. Misli Premyer Liqasının 18-ci turu çərçivəsində dünən meydana çıxan komandalar artıq istirahət haqda düşünə bilər.

Amma “Şamaxı” və “Sumqayıt” fasiləyə fərqli əhval-ruhiyyədə yollandı. Bölgə təmsilçisinin uğurlu oyunlar seriyası bitdisə, “kimyaçılar” darmadağın olmaqla klub rəhbərliyinin iddialı bir komandanı qısa müddətdə necə miskin duruma salmağın mümkün olduğunun növbəti nümunəsini göstərdilər. Autsayderlərin kötəklənməsinin bir səbəbi də rəqiblərinin liderlər olması idi. Qış fasiləsinə major notda yollanmaq istəyən “Neftçi” ilə “Sabah” toparlandıqda amansız ola bildiklərini isbatladılar.

Hər iki matçda nəticəni təcrübə və ustalıq səviyyəsi həll etdi. Neçə oyundu rəqiblərinə qarşı əzmkar oynayan, müdafiədə maksimum etibarlı çıxış edən “Şamaxı”nın fasiləyə darmadağınla yola düşməsi hardasa başadüşüləndi. “Neftçi” kubokda yarımfinala vəsiqə qazanmaqla əla motivasiya əldə etmişdi. Klubdaxili yüksək əhval-ruhiyyə yerində olan kimi komanda yaxşı oynamağa başladı və “Şamaxı”nı yenmək çətin olmadı.

Sumqayıtdakı nəticə isə bir qədər gözlənilməz oldu. Son matçlarda qismən yaxşı təsir bağışlayan komanda uğursuz seriyaya düşən “Sabah”la görüşdə xal qazanmaq ehtimalı var idi. Lakin bakılılar toparlandı və heyət keyfiyyətini oyun keyfiyyətinə çevirib rəqibini tar-mar etdi. “Sabah” bizi öyrəşdirdiyi kimi oynamağa başlayınca həm gözəl futbola şahidlik etdik, həm də lider və autsayder qrupları arasındakı fərq üzə çıxdı.

6:0 həm də “Sabah”ın qısası idi. Ötən mövsüm paytaxt təmsilçisini avrokubok yarışında büdrədən “kimyaçılar” dünən meydanda əlacsız idi.

Bu gün daha 4 komanda üçün mövsümün ilk yarısı bitəcək. “Qarabağ” çempionatd son yenilgisini aldığı “Səbail”lə üz-üzə gələcəksə, Qəbələdə bölgə komandaları qarşılaşacaq.

FƏRİD