Dünya futbolu
Londonun ən yaxşısı
“Arsenal” “Çelsi” üzərində qələbə ilə bir sıra ilklərə imza atdı. 3:1 hesabı ilə üstün olan “topçular” tarixdə ilk dəfə 10 London derbisində rəqiblərini üstələdi.
Futbolinfo.az xəbər verir ki, “Arsenal” ümumiyyətlə, “zadəganlar”a qarşı keçirdiyi son 7 matçın 6-da qələbə qazanıb ki, bu da bir ilkdir. 21-ci əsrdə belə seriya olmamışdı.
Ötən tur “Mançester Siti”yə uduzaraq zirvəni rəqibinə təhvil verən “topçular” yenidən ilk pilləyə qayıtdı. Amma “şəhərlilər”in ehtiyatda iki matçı var və çempionluğa daha real namizəddirlər. Buna “Arsenal”ın ardıcıl xal itkiləri şərait yaratdı. Təsadüfi deyil, Mikel Artetanın yetirmələri dünən son 5 matçda ilk qələbəsini əldə etdi. Lakin növbəti rəqibin iddialı “Nyukasl” olduğunu da xatırladaq.
Dünən fərqlənən Qabriel Jesus komandasının daha bir göstəricisini yaxşılaşdırdı. Hazırda Avropanın 5 aparıcı liqasında “Arsenal”dan başqa 4 futbolçusu 10 və daha çox top vuran komanda yoxdur. Dubl edən Martin Odeqard 14 qolla bombardirə çevrildi, Bukayo Saka 13 dəfə fərqlənib. Jesusdan başqa Qabriel Martinelli də bu mövsüm 10 qol vurub.