Ölkə futbolu
“Neftçi” Eddi İsrafilovun transferini həll edib
“Neftçi” qış fasiləsinin ilk transerini gerçəkləşdirib. Paytaxt klubu Azərbaycan millisində oynamış Eddi İsrafilovu rənglərinə bağlayıb.
O, bu səbəbdən “Luqo” ilə 2 aylıq müqavilənin müddətini uzatmayıb. İyunda “Albasete”dən ayrıldıqdan sonra klubsuz qalan, noyabrda “Luqo”ya baxışa gedən və bəyənilən yarımmüdafiəçi gələcəyini Sequndanın adıçəkilən təmsilçisində görməyib. İspaniyanın aşağı liqa komandası da 29 yaşlı orta sahə oyunçusunun bu addımına anlayış göstərib.
2015-ci ildən Azərbaycan yığmasına dəvət alan Eddi son olaraq, 2019-cu il noyabrında Slovakiyaya səfərdə 0:2 hesabı ilə uduzduqları AVRO-2020-nin seçmə oyununda bu formanı geyinib. İsrafilov gələn ilin ilk ayında İspaniyadan bura gələcək. O, vaxtilə millimizin şərəfini qoruduğundan yerli oyunçu statusu ilə sifariş olunacaq.
İlk olaraq sportinfo.az-ın yaydığı informasiya dəqiqdi. Öz mənbələrimizdən də bu xəbərə təsdiqlər almışıq. Əlavə olaraq qeyd edək ki, Eddi klubun yeni idman direktoru Zaur Əzizovun ilk transferi sayılmamalıdı. İsrafilovun keçidi bu şəxsin gəlişinə kimi həll olunub.
Eddinin transferi əsasən yerli oyunçu yetərsizliyi ilə bağlıdı. Ölkədə “Neftçi”ni gücləndirəcək azad agent olmadığından bakılılar bu varianta əl atıb. Üstəlik, Mamadu Kanenin gedişindən sonra dayaq yarımmüdafiəçisi kimi ona ümidlər böyükdü. Millimizin üzvünün maaşı da fantastik olmayacaq. Son vaxtlar çıxış etdiyi klublarda az şans qazanması onu kiçik məbləğ qarşılığında Azərbaycana gəlməyə vadar edib.