“Neftçi”nin riskli seçimi: Sərgənlə uzun yola çıxmaq olmaz!

“Neftçi”də yenə qeyri-müəyyənlikdir. Komandada baş məşqçi Laurentsiu Regekampfla yollar ayrılmayıb, Sərgən Yalçın isə artıq Bakıya bilet alır.

Paytaxt klubunda yenə xaos var. Klubun faktiki rəhbərliyi bir yanda qalıb, sponsorların nümayəndəsi məşqçiylə danışıq aparır. Hərə bir yanda komandanın hədəflərini müəyyənləşdirir. Yalandırsa, təkzib etsinlər!..

Hamının eyni hədəfə vurmadığı, bir-birinə etimadsızlığın hərəkətlərlə göstərildiyi klub yenə səhv yoldadır. Səhvlərdən nəticə çıxarılmayıb, inkişaf üçün yol xəritəsi cızılmayıb. Dəyişiklk naminə dəyişiklik edilir. Klubda bir çox problemlər olmasına rəğmən, baş məşqçi postu üzərində oyun qurulur.

Sərgən Yalçın Türkiyə futbolunda iz qoymuş oyunçudur. Vəssalam. Məşqçi Sərgən haqda eyni sözləri deyə bilmərik. Və “Neftçi”yə inkişafa yönəlik sistem qurması lazım gələn bir məşqçi gərək ikən, rəhbərlik daha çox şou xarakterli addım planlayır. Regekampf hər nə qədər pis məşqçi olsa da, Yalçından betər deyil. Türkiyəli özünü sübut etməmiş, daha çox açıqlamaları, qalmaqalları ilə gündəmdə olan biridir.

Sərgən bəlkə də əsl potensialını Bakıda açacaq. Amma bu, çox kiçik ehtimaldır. O, Türkiyə nəhənglərindən təklif gözləyə-gözləyə qalıb və “Neftçi” ilə uzunmüddətli anlaşmadan boyun qaçırır, bura müvəqqəti dayanacaq, ehtiyat variant gözü ilə baxır. Təkcə bu fakt mümkün təyinatın perspektivsizliyini isbatlayır.

Müşahdə Şurası səviyyəsində yenilənən rəhbərliyin “Neftçi”nin büdcəsini kifayət qədər artırdığı deyilir. Lakin pulu Sərgən üçün dağıtmağa dəyməz. O, özü ilə böyük məşqçilər korpusu gətirəcək, bahalı transferlər istəyəcək, bəzi futbolçular mütləq alınsın deyə layiq olmadıqları məbləğlərə transfer olunacaq.

Yalçının təyinatı həddindən artıq risklidir, hətta uğursuz alınmaq faizi daha yüksəkdir. Onun müəllimi Mustafa Dənizli “Xəzər Lənkəran”da sərhədsiz büdcə ilə nəyi bacardı ki, Sərgəndən nəyi gözləyək? Hər nə qədər qardaş ölkələr olsaq da, futbol mentalitetimiz fərqlidir. Bülənt Korkmazı, Güvənc Kurtarı, Fuad Yamanı və başqalarını da xatırlayaraq qeyd edək ki, türkiyəli mütəxəssislərin Azərbaycanda uğurlu olmasının zamanı hələ yetişməyib.

Regekampfı əsl məşqçi ilə əvəz etmək lazımdır. “Beşiktaş”a rəhbərlk etməsi hələ Sərgənin “Neftçi”də uğurlu olacağını deməyə əsas vermir. Unutmayaq, Yalçın 8 ilə 9 iş yeri dəyişən, ən çox çalışdığı yerdə ilyarım davam gətirən, 2021-ci ilin dekabrından şans gözləyən biridir. Rumın çalışdırıcının statistikası daha yaxşıdır.

FƏRİD