“Qələbə üçün əlimizdən gələni edəcəyik” – De Byazi

Azərbaycan millisinin baş məşqçisi Canni De Byazi AVRO-2024-ün seçmə mərhələsinin növbəti turunda Estoniya ilə keçiriləcək oyun öncəsi mətbuat konfransı keçirib. Futbolinfo.az saytı xəbər verir ki, italiyalı mütəxəssis qarşılaşmanın baş tutacağı “Dalğa Arena”da təşkil olunan tədbirdə jurnalistlərin suallarını cavablandırıb.

67 yaşlı çalışdırıcı əvvəlcə sabahkı qarşılaşma ilə bağlı fikirlərini bölüşüb: “İlk iki oyunda uduzduq, 9 qol buraxdıq. İki güclü komanda ilə qarşılaşdığımızı da nəzərə almalıyıq. Həm Avstriya, həm də İsveçlə görüşün bəzi hissələrində yaxşı çıxış etdi. Təbii ki, individual səhvlər oldu, bu da bizə baha başa gəldi. Ümid edirəm ki, bu, təcrübəsi az olan futbolçular üçün dərs olar”.

– Mahir Emrelini sabah hansı mövqedə oynatmağı düşünürsünüz?
– Son 7 oyundakı sistemi artıq bilirsiniz. Bu sistemdə yaxşı nəticələr göstərdik, 5 qələbə qazandıq. Son iki görüşdə uduzmuşuq, bu da futbolda baş verir. Mahir sabah oynayacaq. Yəqin ki, son vaxtlar çıxış etdiyi mövqedə yer alar.

– Estoniya dişimizə görə rəqibdir və hər kəs qələbə gözləyir. Bu amil psixoloji təsir göstərə bilər?
– Düşünürəm ki, təsir göstərməz. Son iki görüşdə uduzduğumuzdan, uşaqlarda revanş istəyi var. Estoniyada mövsümün gedişidir. Ancaq yenə də ümid edirəm ki, sabah 3 xal qazanacağıq. Ola bilər ki, bəzi oyunçular bu tempdə oynamağa öyrəşməyiblər. Əgər başqa çempionata öyrəşmisənsə və rəqibin böyük liqalarda çıxış edirsə, çətinliklə üzləşəcəksən. Bizim matçlardakı inkişafı görmürüksə, deməli, özümüz görmək istəmirik.

– Sabahkı oyundan nə gözləyirsiniz?
– Onların Avstriya ilə oyununu izləmişəm, yaxşı çıxış ediblər. Futbol riyaziyyat deyil. İstənilən halda sabah qələbə üçün əlimizdən gələni edəcəyik. Bilirəm ki, futbolçularımızda yorğunluq var. Ancaq uğur qazanmaq üçün sabah rəqibdən çox qaçmalı, böyük enerji sərf etməliyik.

AĞA