Ölkə futbolu
“Qarabağ” çempionluğa, “Qəbələ” vidaya tələsir
“Qəbələ” I Liqaya hazırlaşa bilər. Komandanın bundan sonra Premyer Liqada iştirakçı sayının artırılması və onlara da güzəşt edilməsi sayəsində elitada qalması mümkündür. “Kəpəz”lə 11 xallıq fərqin qapadılması nəzəri cəhətdən real olsa da, psixoloji cəhətdən çökmüş “qırmızı-qaralar”ın bunu bacarması möcüzə olar. Bu baxımdan dünən “Səbail”ə məğlubiyyət sarsıdıcı oldu.
Əslində, oyun “Qəbələ” üçün əla başlamışdı. Ardıcıl iki qoldan sonra meydan sahiblərinin qələbəsi qaçılmaz görünürdü. Lakin bir epizod hər şeyin alt-üst olması üçün kifayət etdi. Qapıçı ilə müdafiəçininin anlaşa bilməməsinin ardınca rəqib futbolçuya qarşı kobudluğun qırmızı vərəqə kimi dəyərləndirilməsi dönüş anı oldu.
Bu il əksər xallarını məhz hakimlərin yardımı sayəsində qazanan “Səbail” özünə gəldi, özünü arxalı hiss etdi və xaos içində olan rəqibə ardıcıl zərbələr vurdu. Fasilədən həmən sonra hesabın bərabərləşməsi ilə qonaqlar ümidləndi və son dəqiqələrdə qələbə qolunu da gördük.
“Qəbələ”nin azlıqda qaldığı epizodda qırmızı vərəqə çox ağır qərar idi. Amma hakimlər təkcə bununla kifayətlənmədi. Matçın ümumi idarəçiliyində qonaqlara rəğbət aşkar hiss olunurdu, epizodlara fərqli standartlarla baxıldığı üçün “dənizçilər” cəsarətləndi və qələbəni təmin etdi.
“Qəbələ”nin məhz bu məqamda klub kimi imicini itirdiyi göründü. 2:0 hesabının əldən verilməsi, hakimlərin meydan sahiblərini bu qədər sıxması “Qəbələ” rəhbərliyinin futbolu çoxdan unutmasını göstərdi. Komandanı qoruya bilmirsənsə, hamı üçün onu əzmək çox asan işdi. Onlar hakimlərin aşkar səhvlərinin sıralandığı vaxt “günah özümüzdədir” deyəndə uduzmuşdular.
“Səbail” həm yaxşı oyunu, həm də gördüyü dəstək sayəsində yenidən liderlər qrupuna yüksəldi. 2-ci yeri müvəqqəti dayanacaqdır, lakin əsas rəqiblərin qeyri-sabit çıxış etdiyini nəzərə alsaq, avrokuboklara vəsiqə qazanmaq mümkündür.
“Qəbələ” isə artıq “Kəpəz”dən 11 xal geridədir. Bu fərqi əritmək üçün gəncəlilər dayanmalı, “Qəbələ” qələbələri sıralamalıdır. “Qırmızı-qaralar”ın təkcə gəncəliləri ötmək üçün azı 4 qələbəyə ehtiyacı var ki, indiki halda bu, mümkünsüz görünür. Çünki 25 tura cəmi 4 dəfə qələbə qazanan komandanın 11 tura bunu bacarması real deyil. Kaxaber Sxadadzenin Azərbaycana dönüşü yalnız statistikanı zənginləşdirmək baxımından önəmli olacaq.
Misli Premyer Liqasında 25-ci turun son oyunu “Neftçi”nin darmadağını ilə bitdi. Mərkəzi matça bu həftə “Bayer”ə qarşı çıxacağı start heyəti ilə başlayan ağdamlıların niyyəti özünü sınamaq idi. Bir növ leverkuzenlilərlə qarşılaşmanın məşqi üçün bakılılar sparrinq-rəqib seçilmişdi. Düzdür, “Neftçi” Almaniya klubunu əvəz edəcək səviyyədə rəqib deyildi, amma Elvin Cəfərquliyev, Julio Romao kimi futbolçuların yoxluğunda onların əvəzedicilərini sınamaq vacib idi.
“Neftçi”nin yaşlı və ləng orta sahəsi “Qarabağ”ın təzyiqinə davam gətirə bilmədi. Ağdamlılar 2 qol vurub sakitləşəndən, özünü Bundesliqanın lideri ilə görüşə qorumağa başlayandan sonra fərq azaldı. Meydan sahibləri son dəqiqələrdə xal ümidi ilə irəli atılanda isə qonaqların öldürücü əks-hücumları hesabı darmadağın həddinə çatdırdı.
“Neftçi”nin bütün problemləri mövsümöncəsi atılan yanlış addımların nəticəsidir. Yeni baş məşqçi Miodraq Bojoviç sadəcə, yaya kimi oyunları yola vermək üçün gətirilmiş biridir və indiki işi ilə onunla əməkdaşlığın davam etdirilməsi mümkünsüzdür. Yayda paytaxt klubunda çox şey dəyişməlidir, əks halda çempionluq mübarizəsi yenə rəqabətsiz keçəcək. “Qarabağ”ın sona 11 tur qalmış əsas rəqibindən 23 xal geri qalması utancvericidir. Bu, təkcə ağdamlıların çox güclü olmasının yox, həm də rəqiblərinin miskin gündə olması deməkdir. Yeni avrokubok mövsümündə təmsilçilərimiz ilk mərhələdəcə ələnəndə bu günləri xatırlayacağıq.
FƏRİD
- Premyer-liqa2024-04-14 20:55
“Qarabağ” “Sabah”a uduzdu
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Ölkə futbolu2024-04-14 08:00
“Turan Tovuz” avrokubok mübarizəsinə qayıtdı