Digər idman növləri
“Red Bull” – qaldığı yerdən davam
Bəhreyndə Formula 1 üzrə dünya çempionatının ilk mərhələsi geridə qalıb. Maks Ferstappen ilk yarışda qələbə qazanıb.
Təsnifat mərhələsində ən yaxşı nəticə göstərərək ilk cərgədən start vermək hüququnu qazanan niderlandlı sürücü, yarış boyu rəqiblərinə şans verməyib. Startdan sona qədər liderlik edən Maks karyerasında 5-ci dəfə “Böyük dəbilqə” (təsnifatda ən yaxşı nəticə, startdan finişədək liderlik, ən sürətli dövrə, yarışda qələbə) edib. Bununla da o, əfsanəvi Mixael Şumaherə çatıb.
Formula 1 tarixində bunu ən çox edən sürücü Cim Klarkdır. O, 8 dəfə belə uğura imza atıb. Lyuis Həmiltonun aktivində 6 “Böyük dəbilqə” var.
Təsnifatda ikinci olan Şarl Lekler podiuma yüksələ bilməyib. Ümumiyyətlə yarışı “Ferrari” üçün uğurlu saymaq olar. Lekler komanda yoldaşından başqa Serxio Peresi də özündən irəli buraxıb. Corc Rassel də Lekler kimi mövqeyini qoruya bilməyib. Belə olduqda Peres və Sayns podiuma yüksəlməyi bacarıblar.
İlk onluqda 5 komanda yer alıb. Bu da demək olar ki, keçən ilin mənzərəsinin bənzəridir. Hazırda bu beş komanda arasında ən zəifi “Aston Martin”dir. Autsayderlər isə yenə də xal üzünə həsrət qalıblar.
Xatırladaq ki, mövsümün ikinci yarışı gələn həftə Səudiyyə Ərəbistanında olacaq.