“Səbail”də 4 yeni legioner: İsrail, Portuqaliya və Anqoladan

Yeni mövsümün hazırlıqlarına başlayan “Səbail”də transferlər reallaşmaq üzrədir. Bu gün Bayıl təmsilçisi 4 yeni legionerin keçidini açıqlayacaq.

Futbolinfo.az yeni əcnəbilərin adını öncədən dəqiqləşdirə bilb. Yəqin ki, tezliklə klubdan da rəsmi açıqlama veriləcək.

Yeni mövsümdə “Səbail”in formasını iki israilli geyəcək. Onlardan biri olan Nir Bardeanın son klubu “Makkabi” (Bney Rayna) olub. Daha öncə “Aşdod”da, həmçinin Macarıstan “Honved”ində oynamış 27 yaşlı müdafiəçi azad agent kimi gəlir.

İndiyədək yalnız İsrail klublarında oynamış Yadin Luqasi “Səbail”in növbəti transferi olacaq. “Kiryat Şimona”ya məxsus olan, son 3 mövsümü “Hapoel”də (Akre) keçirən yarımmüdafiəçinin 24 yaşı var.

Digər transfer Portuqaliyadandır. “Benfika” yetirməsi olan 28 yaşlı pleymeyker Pedro Nuno vətənində “Akademika”, “Koimbra”, “Tondela”, “Moreyrense”, “Belenenseş” kimi klublarda oynayıb. Son mövsümü “Adanaspor”da keçirən oyunçu hazırda azad agentdir.

Digər oyunçu da Portuqaliyadan gəlir. 31 yaşlı anqolalı Valdemar Almeyda bu ölkənin orta səviyyəli klublarında çıxış edib. Son 3 ili “Akademika”da keçirmiş yarımmüdafiəçinin də müqavilə müddəti bitib.

Bu legionerin hamısı ilə birillik müqavilə bağlanması planlaşdırılır.