Şəhriyar Əliyev: “Səhvim var və cəzamı çəkirəm”

“Keşlə”nin müdafiəçisi Şəhriyar Əliyevin futbolinfo.az saytına müsahibəsi

• “Keşlə” çempionata çox pis başlayıb. Bunun səbəbi kimi nəyi görürsən?
• Həqiqətən də iki oyun, iki məğlubiyyət pis nəticədir. Düzdür, bu matçların heç birini pis oynamamışıq. Qol şanslarımız da olub. Lakin istifadə edə bilmədik. Bütün bunlar bir kənara, əsas nəticədir ki, biz də 2 oyun uduzmuşuq. Çox səbəblər tapmaq olar. Heyətdən xeyli oyunçu getdi, yeniləri gəldi. Bir az uyğunlaşmada problemlər yaşaya bilərik. İndi fasilə olub və biz bu fasilədən necə lazımdır yararlanmışıq. Gələn turda qələbə qazanacağıq.
• Komanda müdafiədə ciddi səhvlərə yol verir. Bunu hələ öz oyununuzu tam tapmamaqla əlaqələndirirsən, yoxsa dəyişikliklər ciddi təsir edib?
• Müdafiə hücumdan başlayır. Komanda kollektiv şəkildə hücuma da çıxmalıdır, müdafiə də olunmalıdır. Həqiqətən əgər bir komandadan 4-5 oyunçu gedirsə, yerinə başqa 4-5 futbolçu gəlirsə, bu, artıq çətinlik yaradır. Deyim ki, yenilərin sxemə oturması vaxt alır. Ümid edirəm ki, bu yaxşıya doğru dəyişiklik tez bir zamanda baş verəcək.
• “Keşlə”nin bu mövsüm üçün hədəfi nə olacaq?
• Rəhbərlik qarşımıza avrokuboklara getmək məqsədi qoyub. Bu həmişə bizim məqsədimiz olub. Düzdür, uğursuz start vermişik. Amma bu, heç nə demək deyil. Çünki qarşıda uzun marafon var və bizi çoxlu oyun gözləyir. Növbəti “Zirə” matçından xal qazana bilərik və bu “qara zolaq”dan çıxarıq.
• Son Azərbaycan Kubokunun sahibi niyə heç də yaxşı vəziyyətdə görünmür?
• İki tura görə fikrimcə, bunu demək olmaz. Həmin matçların heç birində məğlubiyyətə layiq oyun göstərməmişik. Qarşıda bizi uğurlu oyunlar gözləyir.
• Komandada maliyyə problemləri davam edir, yoxsa vəziyyət düzəlib? Çünki bir ara futbolçuların bəziləri maddi problemlərdən şikayətlənirdi…
• Heç bir maddi problemimiz yoxdur. Ötən ildən qalan maaşlarımızı da, bu mövsümki maaşımızı da almışıq.
• AFFA İntizam Komitəsi tərəfindən sənə verilən 4 oyunluq cəza ağırdır, yoxsa cəza ilə razılaşırsan?
• Elə bir epizod oldu ki, o sözü deməməli idim. Matça əlavə edilmiş dəqiqələr gedirdi və ani epizod oldu ki, lazımsız ifadə işlətdim. Cəzaya gəlincə, təhqirdir və qaydalar belədir ki, buna razılaşmalıyam. Qarşılaşmadan sonra da getdim hakimlə danışdım. Mənim üçün çox çətin olacaq. Milli komandaya görə fasilə yaranıb və 2 aya yaxın futbol oynayamayacam. Çalışacam ki, gedib əvəzedicilərdə özümü formada saxlamaq üçün oynayım.
• Niyə belə hərəkətə yol verdiyin barədə heç düşündün? Səni daha çox sakit təbiətinlə tanıyırlar…
• “Sumqayıt”la evdəki matçda yaxşı oynasaq da, uduzduq, “Qəbələ” ilə səfərdə də pis çıxış etmədik, lakin adi səhvlərdən uduzduq. Bunlar hamısı adamı əsəbiləşdirir. Əsəb üstünə əsəb gəldi və belə oldu. Həmin epizodda hakim cərimə zərbəsini vermədi. Bu da əsəb, stress yaratdı. Elə oldu ki, özümü saxlaya bilmədim. 4 oyun cəza verildi və sonra ümid etdim ki, 2-sini şərtiyə endirərlər. Amma olmadı. Yadınıza gəlir ki, ötən il eyni hadisələr olmuşdu və həmin futbolçuların cəzasın yarısı şərti olmaqla endirmişdilər. Nə deyim, səhvim var və cəzamı çəkirəm. Düşünürəm ki, həvəsdən düşmək lazım deyil. Məşq etmək, çalışmaq və uğur qazanmaq lazımdır.

AĞA