Səs-küylü Formula 1-də sakitlik və ya Kanada qran-prisindən gözləntilər

Kanada qran-prisi Avropa mərhələlərinin arasında yer alır. Jil Vilnövün adını daşıyan avtodromdakı yarışa Formula 1 sakit tərzdə yaxınlaşır. Barselona qran-prisindən sonra azacıq şübhəsi olanlar da Maks Ferstappenin gücünü gördülər. Hazırda F1-də əsas sual niderlandlının çempionluğu nə vaxt təmin edəcəyidir.

“Mercedes” və Lüis Həmiltonun hegemonluğu dövründə Formulada müəyyən qədər intriqaları görmək olurdu. Bu ilin Ferstappenli “Red Bull”u isə əlçatmazdır. Çempionatın ilk yarışlarında Peresin qələbələri və Alonsonun podiumları neytral azarkeşləri sevindirirdi. İndi artıq Peres də qələbədən çox uzaqdır, Alonsonun da uğurları mənasızdır.

İki həftəlik fasilə ərzində Formula 1-də demək olar ki, həyat sönmüşdü. Bu müddət ərzində yalnız Corc Rasselin Maks Ferstappen haqqında söylədikləri gündəm oldu. İngiltərəli pilot “Red Bull” bolidinin sürətli olduğuna eyham vuraraq Maksın bu il elə də aqressiv olmadığını bildirdi. Bununla da Rassel niderlandlı pilotdan müəyyən mənada qisas almaq fikrindəydi.

Xatırladaq ki, Bakı yarışında Rasselin manevrinə görə Ferstappen efirdə ona nalayiq ifadələr ünvanlandırmışdı.

Kanadada keçiriləcək mərhələdə də Ferstappenin dominantlığı davam etməlidir. Ötən yarışda göründüyü kimi, Maks heç də qələbələrdən doymayıb. Doğrudur, son vaxtlar o, trasda özü ilə mübarizə aparır. Hazırda 53 xal fərqlə liderlik edən pilotun arxayanlaşacağını heç kim gözləməməlidir. Maks əlinə düşən fürsətdən yararlanaraq F1-də yeni rekordlara doğru addımlamaqda qətiyyətlidir.

Niderlandlı pilotdan sonrakı yerlərdə isə intriqa qızışmalıdır. Kanadada Maksın qələbə ehtimalı həddindən artıq yüksəkdir. Çox güman ki, bu dəfə də o öz liqasında yarışacaq. Amma podiumun digər pillələri üçün mübarizə gərginləşməlidir. Ötən yarışda gücünü göstərən “Mercedes” komandasının yenilikləri gündən-günə bolidi sürətli edir. Yan pontonların əlavə edilməsindən sonra xeyli irəliləyən “Mercedes” maşınları Barselonada rəqiblərini qorxutdu. Ciddi maliyyə nəzarətinin olmasına baxmayaraq, alman komandası mövsümün gedişində sürətlənməkdə davam edir. Bu baxımdan onların “Aston Martin”lə mübarizəsi maraqla gözlənilir. İngiltərə təmsilçisinin inkişaf üçün resursu qalmadığı hiss edilir. Komanda bütün potensialın mövsümün əvvəlində nümayiş etdirib. Bu səbəbdən də “Mercedes”in ikinci yerə əsas namizəd olmasını söyləmək mümkündür. Baxmayaraq ki, Toto Volf Kanada trassının onlara uyğun olmadığını söyləyib. Amma bu kəlamlar bir qədər reallıqdan uzaq da ola bilər.

Siyahıya “Ferrari”nin salınmasına ehtiyac yoxdur. İtaliya komandası bu il ötən ildən də bərbad çıxış edir. Ən çox azarkeş kütləsinə malik komandanın fanatları müəyyən qədər Le-Mandakı qələbəyə sevinməlidirlər. Fransadakı qələbə onların nəvaxtsa Formula 1-də də yenidən zirvədə olacağı ümidlərini artırıb. Onlar bu ümidlərlə də elə mövsümün sonunu gözləməlidirlər.

Kanada Qran-prisinin təqvimi:

16 iyun, 21:30. Birinci praktika

17 iyun, 01:00. İkinci praktika

17 iyun, 21:30. Üçüncü praktika

17 iyun, 00:00. Təsnifat

18 iyun, 22:00. Yarış

İLQAR AĞAYEV