Ölkə futbolu
“Sabah”ın mesajı var – növbəti mövsüm üçün
Heç nə dəyişməyib. “Qarabağ” yenə lider və çempionluğa əsas namizəddir. Sadəcə, “Sabah” layiqli qələbə sayəsində ağdamlılarla xal fərqini 9-a endirib onların növbəti çempionluğunu qeyd edəcəyi günü bir az yubatdı. 6 tura lazım olan 10 xalı qazanmaq Qurban Qurbanovun yetirmələri üçün problem olmayacaq.
Lakin dünənki matçın “Sabah” üçün önəmli olan tərəfi “Qarabağ”ı tarixləri ərzində ilk dəfə yenmələri oldu. Bu, həmçinin ağdamlıların mövsümü məğlubiyyətsiz tamamlayaraq “Kəpəz”in göstəricisini təkrarlaya bilməyəcəkləri deməkdir. Çempionun həmçinin səfər oyunlarındakı yenilməzlik rekordu qırıldı.
“Sabah” bu qələbə ilə növbəti mövsümün anonsunu da verdi. Bu mövsüm şəxsi oyunlarda “Qarabağ”dan zəif olmayan bakılılar gələn çempionatda qızıl medallara iddia edə biləcəklərini göstərdilər. “Qarabağ”ı udmaq, onlarla mübarizə aparmaq, ən azı ciddi rəqabət yaratmaq olar.
O da var ki, “Sabah” bunu bacarmaq üçün təcrübəsini artırmalı, sabitliyə nail olmalıdır. Evdə autsayderlərlə oyunlarda itirilən xallar olmasaydı, Murad Musayevin yetirmələri indi zirvəyə şərik idi. “Qarabağ” məhz bu səhvləri etmədiyi üçün qızıl medallarının sayını artırır. “Sabah” isə ötən tur autsayderə yeniləcək, bu tur lideri yenəcək qədər qeyri-sabit oynayır.
Dünənki nəticə “Qarabağ”a da dərs olacaq. Ağdamlıların meydandakı mübarizəsindən hiss olunurdu ki, komanda daha çox heç-heçəyə oynayıb xal fərqini qorumaq niyyətindədir. Komanda qol buraxdıqdan sonra təzyiqi artıran kimi penalti qazandı, matçda dönüş yaratdı. Sadəcə, “Sabah” ardıcıl iki qol vurduğundan vəziyyəti dəyişməyə vaxt çatmadı. Meydan sahibləri ən uyğun zamanda arzulanan hesabı təmin etmişdi.
“Sabah” bu qələbə sayəsində iki gün öncə evdə “Qəbələ”yə uduzan “Neftçi”dən də uzaqlaşdı. Qeyri-adi bir şey baş verməsə, Musayevin yetirmələri mövsümü gümüş medalla başa vuracaq. Laurentsiu Regekampfın yetirmələrinin çempion olmaması növbəti tur rəsmiləşməlidir, 2-ci yer üçün isə hələ ümid var.
Dünənki oyun avrokuboklar baxımından da önəmli idi. Qitə yarışlarına vəsiqəni təmin edən “Qarabağ”la “Sabah” bu uğura aldanmayaraq güclənməlidir. Bakılıların debütdə çətinlik çəkəcəyi aydındır – təcrübə yoxdur, üstəlik, reytinq üzündən püşkdə güclü rəqiblərin düşməsi gözlənilir. Heyəti qorumaq mümkün olsa, edilən əlavələrlə nəyəsə ümid bəsləmək mümkündür. Daha çox şey tələb olunan “Qarabağ” isə mütləq heyətə əl gəzdirməlidir. Qış transferləri komandaya uyğunlaşmayıb, getməsi gözlənilən futbolçular var. Heyət gücləndirilməsə, çox çətin olacaq. Qeyri-sabit “Sabah”la bacara bilməmək siqnal olmalıdır.
FƏRİD
- Ölkə futbolu2024-05-13 10:15
İK gündəmi: Premyer Liqada say dəyişməyəcək?!
- Ölkə futbolu2024-05-13 08:32
“Qarabağ” – postsovet məkanının ən yaxşı komandası
- Ölkə futbolu2024-05-13 19:32
Rövşən Nəcəf: “Premyer Liqada iştirak edəcək klubların sayında artım olmayacaq”
- Milli komanda2024-05-12 15:31
Millimiz iki yoldaşlıq görüşü keçirəcək