Sadıq Sadıqov fərqi

Şuşada uduzmaq olmaz. Hətta bizim üçün ənənəvi idman növü olmayan basketbolda da…

…Və nə yaxşı ki, “Neftçi”, qısa müddətdə belə komanda yaradıb ona rəhbərlik edən vətənpərvər insanlar var. Dünən bu komanda çoxlarının gözləmədiyi halda önəmli qələbə qazandı.

İdmanda məğlubiyyət faciə sayılmamalıdır. Hər nə də olsa, oyundan danışırıq. Lakin həmin oyun Şuşa kimi müqəddəs şəhərdə keçirilirsə, məğlubiyyət böyük məyusluq gətirir. Necə ki, 3×3 üzrə basketbol millimiz hətta müqavimət göstərmədən məğlub oldu, hamını məyus etdi. Lakin 1992-ci ildə rahatlıqla təslim edilən Şuşanı 2020-ci ildə geri alan qəhrəman oğullarımız kimi səriştəsizlərin idarə etdiyi millinin uğursuzluğunu da peşəkarların idarə etdiyi “Neftçi” unutdurdu.

Bu “Neftçi” futboldan tanıdığımız “Neftçi” deyil. Amma rəhbəri eyni şəxsdir. Futbol klubu ilə illər öncə çempionluqlar sıralayan, avrokubokda ilk dəfə qrupa düşən prezident Sadıq Sadıqov bu dəfə “Neftçi” İSM ilə Şuşada önəmli qələbəyə sevindi. “Neftçi” 3×3 basketbol üzrə Dünya Qadın Seriyasının mərhələ çempionu olaraq ilkə imza atdı. Finalda Niderland millisinə qalib gələn Azərbaycan təmsilçisi kommersiya klubu olaraq çempionluq qazanan ilk kollektiv oldu.

Bəli, bizdə basketbolun böyük ənənələrindən danışa bilmərik. Özü də qadınlar arasında keçirilən 3×3 basketbolu ümumiyyətlə, yenidir. Lakin işi düzgün qurursansa, nəticələrin gəlməsi mümkündür. Necə ki, bunu “Neftçi” bacardı. Nəticə qazanmağı bilən, idarəçilik qabiliyyəti olan Sadıqovla…

Bir yerdə ki, legionerlərin həyətə cəlb edilməsi mümkündür, o zaman ən yaxşısını etməyə çalışmalısan. Yığma komandamızda da əcnəbilər oynayırdı, “Neftçi”də də. Fərq ondadır ki, milli komanda idmana qazanc mənbəyi, karyera yüksəlişi üçün pilləkən gözü ilə baxan qalstuklu intelligentlərin idarəsində idi və onların işinin nəticəsi biabırçı hesablar oldu. İdmanın içindən çıxan, ömrünü bu sahəyə həsr edən Sadıq Sadıqov isə eyni şərait və imkanlarla qalib ola bilən komanda qurdu.

Milli sanki say düzəltmək üçün yığılan komanda idi. Yığmanın üzvlərindən biri olan, üç ildir heç yerdə oynamadan heyətə cəlb edilən Mersedes Mari Uolker idmançıdan daha çox Amerika filmlərindəki qayğıkeş xidmətçilərə oxşayırdı. Onu kim, necə gətirib, nə qədər pul xərclənib, nə qədəri cibə qoyulub – bütün bunlar araşdırılsa, pis olmaz. “Neftçi”nin uğur qazanmağın mümkünlüyünü isbat etməsindən sonra “bizdə basketbol ənənəsi yoxdur” bəhanəsi ifşa olundu. Basketbol Federasiyasının başbilənləri utanmalıdır!

Futbolda, cüdoda, indi də basketbolda uğur qazanan Sadıq Sadıqov kimi insanları sıxışdırmaq olmaz. Müəyyən səhv addımları ola bilər, lakin belə insanların idman təsərrüfatındakı idarəçilik bacarığından faydalanmaq lazımdır. Öyrənmək heç zaman gec deyil. Sadıqovun gedişindən sonra uğursuzluq girdabında boğulan “Neftçi” futbol klubuna baxıb nümunə götürmək olar.

FƏRİD