“Sumqayıt”la “Səbail”in gələcək üçün planı yoxdur: digər 3 klub isə Divizionda da yaşayacaq

Misli Premyer Liqasında mövsümün həlledici mərhələsi başlayıb. Sona cəmi 6 tur qalıb və bütün suallara ayyarım ərzində aydınlıq gələcək.

Mövsümün bütün mükafatçıları indidən bəllidir. “Qarabağ”ın çempion olmaması üçün möcüzəyə ehtiyac var, “Sabah”la “Neftçi” arasında mübarizə isə əsasən kimin hansı medala sahib olacağı ilə bağlıdır. Digər əsas sual ölkə kubokuna kimi yiyələnəcəyi və avrokuboka 4-cü vəsiqəni kimin qazanacağıdır.

Lakin əsas mübarizə Premyer Liqada qalmaqla bağlı olacaq. Son 6 turda 5 komanda sonuncu olmamaq üçün çalışacaq. Onlardan üçünün vəziyyəti daha qəlizdir.

AFFA rəhbərliyinin son açıqlamalarından bəlli oldu ki, 10-cu yeri tutan mütləq I Diviziona düşəcək. İllərdir idman prinsipinə əhəmiyyət verməyən qurum öz qanunlarına əməl etməyə başlamaqla mübarizəyə də rəng qatıb. Təsəvvür edin, yenə heç kimin elitanı tərk etməyəcəyi bəlli olsaydı, indiki həyəcan da olmazdı. Həm yuxarı sıralarda, həm də autsayderlər qrupunda amansız rəqabət olanda isə çempionat daha çox diqqət çəkərdi.

Aşağı dəstədə lider olan “Araz Naxçıvan” elitaya gəlməyə hazırdır və kimisə əvəz etməlidir. Əvvəlki illərdə Divizionda tələblərə cavab verən yox idisə, indi bu problem həll olunub və sonuncu olanın saxlanması üçün bəhanə qalmayıb.

Bəs, 5 namizəd gələcəyi ilə bağlı nə düşünür? Misli Premyer Liqasında sonuncu olan komanda gələcək taleyi ilə bağlı planlar qurubmu? Bəd ssenaridə kim nə addım atacaq?

Elitada qalmağı hələ də təmin etməyən “Turan Tovuz”, “Kəpəz”, “Sumqayıt”, “Şamaxı” və “Səbail” rəsmilərinə eyni sualla müraciət etdik: “Komandanız Premyer Liqada sonunca yeri tutarsa, hansı addımlar atacağınızı müəyyənləşdirmisizmi? Komanda I Divizionda oynayacaqmı?”

Nadir Nəbiyev (“Turan Tovuz”un idman direktoru): “Mövsümün əvvəllindən başlıca məqsədimiz Premyer Liqada yerimizi qorumaq olub. Mərhələ-mərhələ həyata keçirməyi planlaşdırdığımız böyük layihələrimiz var. Peşəkarlıq yolunda addım-addım irəliləməliyik. Bəzilərinin icrasına artıq başlamışıq. Elektron tablo istifadəyə verilib. Keyfiyətli görüntü üçün çəkiliş meydançasını qarşı tribunaya keçirəcəyik, projektorların qurulması yönündə də müəyyən addımlar atılıb. Qeyd etdiyim kimi, məqsədimiz bu mövsüm Premyer Liqada yerimizi qoruyub, növbəti mövsümə daha iddialı başlamaqdır. Ümid edirəm ki, azarkeşlərimizin də dəstəyi ilə uğurlu nəticələr əldə edib Premyer Liqada yerimizi qoruyacağıq. Elitanı tərk etsək belə, layihələrimizi tam həyata keçirəcəyik”.

İlqar Nadiri (“Kəpəz”in icraçı direktoru): “Təbii ki, bütün klublar kimi biz də komandamızın Premyer Liqadan düşməsini arzulamırıq. Düzdür, hələ bu, dəqiqləşməyib, lakin hadisələrin gedişi göstərir ki, “Kəpəz” elitada qalacaq. Amma komanda sonuncu pilləyə düşərsə, idman prinsiplərinə əməl edilməlidir. “Kəpəz”in aşağı divizionda oynamaq təcrübəsi var, bir neçə dəfə Premyer Liqanı tərk edib. Lakin bu barədə düşünmədiyimizdən hər hansı planlama aparmırıq. Olarsa, yeni strategiya hazırlayıb komandanın növbəti dəfə Premyer Liqaya çıxması üçün planlar qurulacaq. Komandanın Diviziona düşməsi həm uşaq komandalarımız, həm də əsas komanda baxımından Gəncə futboluna böyük zərbə olar. Ona görə də bunun baş verməməsi üçün çalışırıq”.

Faiq Hacı-Məhərrəmov (“Sumqayıt”ın idman direktoru): “Hazırda bütün diqqətimizi Premyer Liqanın növbəti turlarında baş tutacaq oyunlara ayırmışıq. Liqada sonuncu olmaq ağlımızdan belə keçmir.Əsas hədəfimiz mövsümün sonunda turnir cədvəlini maksimum yuxarı pillələrdə bitirməkdir”.

Elçin Usub (“Şamaxı”nın İdarə Heyətinin sədri): “Komandamız 2022-ci ilin iyul ayından etibarən Şamaxı rayonunda məskunlaşmışdır. “Şamaxı “ Futbol Klubu bu mövsümün əvvəlində yeni strategiya müəyyən edərək yerli oyunçuların üzə çıxarılıb inkişaf etdirilməsi və onların ölkə futboluna qazandırılması  istiqamətində çalışmağa başlamışdır. Bu səbəbdən heyət yalnız gənc və təcrübəli yerli oyunçulardan formalaşdırılmış, komandanın qarşısında Misli Premyer Liqasında yerini qorumaq və turnir cədvəlində sonuncu olmamaq hədəfi qoyulmuşdur. Komanda daxilində olan məqsədyönlü inkişaf planı və əzmkarlıq hesabına mövsümün sonuna 6 tur qalmış komandamız 9-cu yerdə qərarlaşmışdır ki, bu da bizim hədəfdən yayınmamağımızın göstəricisidir. Son 6 turda inanırıq ki, bizə lazım olan nəticəni qazanacağıq və Premyer Liqada yerimizi qoruyacağıq. Amma I Diviziona düşəcəyimiz təqdirdə yenə də öz strategiyamızdan əl çəkməyəcəyik. Gənc və perspektivli oyunçularla çıxışımıza davam edəcəyik. Geridə qalan müddətdə Şamaxı şəhərində öz infrastrukturumuzu müəyyən səviyyədə qurmuşuq və getdikcə bu infrastrukturu təkmilləşdirəcəyik. I Diviziona düşəcəyimiz təqdirdə heyətdə olan gənc oyunçularla yolumuza davam edəcəyik və bir mövsümdən sonra yenidən Premyer Liqaya qayıtmaq üçün mübarizə aparacağıq. Bizim klubun strategiyası hamıya məlumdur”.

Fərəc Əliyev (“Səbail”in icraçı direktoru): “İlk əvvəl onu deyə bilərik ki, biz ümumiyyətlə sonuncu olmaq barədə fikirləşmirik. Növbəti oyunlarda Premyer Liqada qalmaq üçün əlimizdən gələni edəcəyik. Ümumiyyətlə, vəziyyət elədir ki, həm Premyer Liqada, həm də kubokda mübarizə aparırıq və hər iki cəbhədə sonadək mübarizəmizi davam etdirəcəyik. Komandanın sonuncu ola biləcəyi və Diviziona düşəcəyi gələcəyə bağlı məsələ olduğu üçün əvvəlcədən proqnoz vermək düzgün olmaz”.

Göründüyü kimi, “Turan Tovuz”, “Kəpəz” və “Şamaxı” Divizionda da oynamağa hazırdır. Belə olacağı halda klublar çıxışını dayandırmayacaq. “Sumqayıt”la “Səbail” isə yalnız ümid edir. Ümid edirlər ki, Premyer Liqada qalacaqlar və bəd sonluğu düşünmürlər. Onlardan hansısa sonuncu olsa…

AĞA